Qyrǵyzstanda qaza bolǵan balalardyń deneleri Óskemenge arnaıy bortpen jetkizildi
ÓSKEMEN. KAZINFORM - Qyrǵyzstandaǵy Osh oblysynyń Nookat aýdanynda selden qaza bolǵan aýyl turǵyndary men týrıster arasynda Shyǵys Qazaqstannyń 4 balasy bar.
Qaıǵyly oqıǵa bolǵan kúni eki ul men eki qyz analarymen týystaryna qonaqqa barǵan. Týrıstik aımaqta júrgen sel shyǵysqazaqstandyqtardyń ómirin qıyp ketti.
ShQO ákimi baspasóz qyzmetiniń málimetine súıensek, búgin balalardyń denelerin Óskemenge arnaıy bortpen jetkizdi. Óńir ákimdiginde balalardyń týystaryna kómek kórsetý úshin jedel shtab qurylyp, oǵan barlyq qyzmetterdiń mamandary jumyldyryldy.
- Aımaq basshysy Ermek Kósherbaev marqumdardyń týystarymen kezdesti. Osy qıyn kúnderde jergilikti atqarýshy organdar men meshit qyzmetkerleri jerleý rásimin ótkizýdi óz moıyndaryna aldy. Óńirdiń kásiporyndary men bıznes ókilderi otbasylarǵa kómek kórsetýge daıyn ekendikterin bildirdi. Ákimdik qyzmetkerleri men Shyǵys Qazaqstan oblysynyń turǵyndary qaıǵyly oqıǵaǵa baılanysty balalardyń týystaryna kóńil aıtty, - delingen aqparatta.
Osyǵan deıin Qyrǵyzstanda joıqyn seldiń saldarynan qazaqstandyq balalardyń qurban bolǵanyn jazdyq.
