Qyrǵyzstanda barlyq esep aıyrysý sommen júrgiziledi

ASTANA. KAZINFORM — Qyrǵyzstanda ulttyq valıýtada esep aıyrysý týraly zań qabyldandy, dep habarlaıdy Kazinform tilshisi.

Qujatqa sáıkes, Qyrǵyzstan aýmaǵynda taýarlar, jumystar men qyzmetter úshin esep aıyrysýlar tek ulttyq valıýta — sommen júzege asyrylady.

Jeke tulǵalar, jeke kásipkerler jáne zańdy tulǵalar, olardyń menshik nysanyna qaramastan, esep aıyrysýdy ulttyq valıýtada júrgizýge mindetti.

Zańǵa sáıkes, Qyrǵyzstanda jyljymaıtyn múlik, avtokólik quraldary sııaqty mámileler boıynsha tólemder men esep aıyrysýlar, sondaı-aq memlekettik tirkeýge jatatyn quqyqtar boıynsha esep aıyrysýlar tek sommen júzege asyrylady.

Shetel valıýtasynda baǵasy kórsetilgen taýarlar, jumystar men qyzmetterdi jarnamalaý zańsyz dep esepteledi.

Zań resmı jarııalanǵan kúnnen bastap 12 aıdan soń kúshine enedi.

Buǵan deıin habarlanǵandaı, Qyrǵyzstanda tsıfrlyq som qabyldaýdan bas tartqandarǵa aıyppul salynady.