Qyrǵyzstanda baǵalar men tarıfter ósip jatyr

BІShKEK. KAZINFORM – Qyrǵyzstanda tutyný baǵalary men tarıfteri osy jyldyń alǵashqy 10 aıynda 2024 jyldyń jeltoqsanymen salystyrǵanda 8,3%-ǵa ósti, dep habarlaıdy Kazinform menshikti tilshisi. 

Qyrǵyzstan Respýblıkasy Ulttyq statıstıka komıtetiniń málimetinshe, 2025 jyldyń qańtarynan qarashasyna deıin azyq-túlik pen alkogolsiz sýsyndar baǵasy 8,9%-ǵa, alkogoldi ishimdikter men temeki ónimderiniń baǵasy 7,9%-ǵa, azyq-túlik emes taýarlardyń baǵasy 7%-ǵa, al qyzmet kórsetý tarıfteri 9,1%-ǵa ósti.

Bıyl qańtardan qarashasyna deıin respýblıkanyń barlyq aımaǵynda tutyný baǵasy men tarıfteriniń ósýi baıqaldy. Eń úlken ósim Osh qalasynda tirkelgen, bul azyq-túlik emes taýarlar baǵalarynyń 10,7%-ǵa ósýimen baılanysty.

Azyq-túlik ónimderi men alkogolsiz sýsyndar baǵasynyń eń joǵary ósýi Shý oblysynda (12%), alkogoldi ishimdikter men temeki ónimderi baǵasynyń Ystyqkól oblysynda (14,2%), al qyzmet kórsetý tarıfteriniń 10,6%-ǵa ósýi Talas oblysynda tirkeldi.

Osyǵan deıin Qyrǵyzstan Respýblıkasynyń Ulttyq banki negizgi mólsherlemeni 100 bazıstik pýnktke, 11%-ǵa deıin kótergenin jazdyq.