Qyrǵyzstan taýlarynda alpınıster qaza tapty

ASTANA. KAZINFORM – Qyrǵyzstannyń Qorǵanys mınıstrligi Jeńis shyńy mańynda alpınısterdiń qaza bolǵany men zardap shekkeni týraly, sondaı-aq olardy evakýatsııalaý úshin kóterilgen Mı-8 tikushaǵynyń apatty jaǵdaıda qonǵanyn habarlady, dep habarlaıdy Qabar agenttigi.

Vedomstvonyń baspasóz qyzmeti taratqan aqparatqa sáıkes, búgin Jeńis shyńy mańynda Qorǵanys mınıstrligine tıesili Mı-8 tikushaǵy (bort nómiri 205) bıik taýly aımaq pen kúrdeli meteojaǵdaıda apatty jaǵdaıda qonýǵa májbúr boldy.

«Tikushaq qoný kezinde qatty soǵylyp, zardap shekkender tirkeldi. Bortta ekıpaj músheleri men evakýatsııaǵa tartylǵan taýdaǵy qutqarýshylar bolǵan. Olardyń barlyǵy tiri. Birneshe adam ártúrli jaraqat aldy, biraq olardyń ómirine qaýip joq», – delingen mınıstrlik habarlamasynda.

Oqıǵa ornyna arnaıy mamandar jiberildi. Olar zardap shekkenderdi evakýatsııalaý jumystaryn jalǵastyrýda. Qorǵanys mınıstrligi qutqarý operatsııasyn ári qaraı júrgizip, jeke quramnyń qaýipsizdigin qamtamasyz etý sharalaryn qolǵa alǵanyn málimdedi.

Aıta keteıik, buǵan deıin Qazaqstan qutqarýshylary 4 myń metr bıiktikte 13 saǵatqa sozylǵan túngi qutqarý operatsııasyn sátti aıaqtaǵan bolatyn.