Qyrǵyzstan halqy 7,4 mln adamǵa jaqyndap qaldy

ASTANA. KAZINFORM –  Qyrǵyz Respýblıkasynyń turaqty halqynyń sany 2025 jyldyń qańtar–qazan aılarynda 103,4 myń adamǵa, ıaǵnı 1,4 paıyzǵa artty jáne 2025 jylǵy 1 qarashadaǵy jaǵdaı boıynsha 7 mln 385 myń adam boldy, dep habarlaıdy Kabar.

Mundaı derekter Ulttyq statıstıka komıtetiniń materıaldarynda jarııalandy.

Memlekettik «Qyzmat» mekemesiniń derekteri boıynsha, 2025 jyldyń qańtar–qazan aılarynda azamattyq hal aktilerin tirkeý (AHAT) organdarynda 117,3 myń jańa týǵan náreste tirkelgen, bul 1 000 turǵynǵa shaqqanda 19,2 (2024 jyldyń qańtar–qazan aılarynda — 20,1).

Sondaı-aq 27,0 myń adam qaıtys bolǵan, bul 1 000 turǵynǵa shaqqanda 4,4 (2024 jyldyń qańtar–qazan aılarynda — 4,5).

Nátıjesinde, halyqtyń tabıǵı ósimi 90,3 myń adamdy, nemese 1 000 turǵynǵa shaqqanda 14,8 boldy (2024 jyldyń qańtar–qazan aılarynda — 15,6).

2025 jyldyń qańtar–qazan aılarynda halyqtyń tabıǵı ósiminiń eń joǵary deńgeıi Batken, Osh, sondaı-aq Jalal-Abad oblystarynda baıqalsa, eń tómen kórsetkish Bıshkek qalasynda tirkeldi.

Aıta ketelik Qyrǵyzstannyń sońǵy saılaý okrýgindegi depýtattar qashan saılanatyny týraly jazǵan edik.