Qyrǵyzstan alǵash ret ulttyq valıýtasyn ózi basyp shyǵardy
ASTANA.KAZINFORM - Qyrǵyzstan prezıdenti Sadyr Japarov bul týraly óziniń áleýmettik jelidegi paraqshasynda jarııalady.
Qyrǵyzstan basshysynyń aıtýynsha, buǵan deıin el óziniń ulttyq valıýtasyn shyǵarý úshin shetelge tapsyrys berýge májbúr bolǵan.
- Endi bári ózgerdi, biz basqa elder úshin valıýtany suranys boıynsha ózimiz basyp shyǵara alatyn deńgeıge jettik. Biz valıýta óndirýge arnalǵan barlyq qajetti standarttar men talaptarǵa sáıkes keletinin rastaıtyn halyqaralyq sertıfıkat aldyq, - dep jazdy Qyrǵyzstan basshysy.
Ol Qyrǵyzstannyń tólqujat, jeke kýálik, júrgizýshi kýálikterin jáne kólik quraldaryn tirkeý qujattaryn joǵary deńgeıde shyǵaratynyn atap ótti.
- Biz tek valıýta ǵana emes, sonymen qatar basqa elder úshin ártúrli memlekettik qujattardy da basyp shyǵarýǵa daıynbyz. Qazirgi ýaqytta biz birneshe elden tapsyrys qabyldap jatyrmyz. Osy sertıfıkattyń arqasynda bizdiń ónimderimizdiń qaýipsizdigi eń joǵary deńgeıde. Basqasha aıtqanda, mundaı qujattardy jalǵan jasaý múmkin emes. Sonymen qatar, baǵalar qoljetimdi bolady, - dep qosty Sadyr Japarov.
Aıta keteıik, Qyrǵyzstan óz tarıhynda alǵash ret 2023 jyly óziniń ulttyq tólqujatyn basyp shyǵara bastady. Sondaı-aq el 2025 jyldyń sáýirinde basqa elderge tólqujat bere bastaǵan.
Sonymen qatar, ótken jyldyń 3 qarashasynda úkimet jańartylǵan dızaıny men jaqsartylǵan qaýipsizdik múmkindikteri bar jalpy azamattyq tólqujattar men jeke kýálikterdiń 2025 jylǵy úlgisin engizdi.
Eske salaıyq, Qyrǵyzstan JІÓ-ni 2030 jylǵa qaraı 30 mlrd dollarǵa jetkizýdi kózdep otyr.