Kıpr sońǵy 50 jyldaǵy eń úlken orman órtimen kúresip jatyr

ASTANA. KAZINFORM — Kıprde sońǵy 50 jyldaǵy eń úlken orman órti órship tur. Ázirge el boıynsha 120 sharshy shaqyrym jer órtendi, dep habarlaıdy Euronews. 

Órt sóndirýshilerdiń habarlaýynsha, 23 shildede órtten zardap shekken aýyldyń tóbeleriniń biriniń ishinde 2 adamnyń máıiti bar órtengen kólik tabylǵan. Taǵy 2 adam aýyr kúıik jaraqattarymen Nıkosııa jalpy aýrýhanasyna jetkizilgen. Olardyń jaǵdaıy aýyr dep baǵalanǵan. Barlyǵy 10 adam zardap shekti. Sondaı-aq órt saldarynan uzyndyǵy 14 shaqyrym bolatyn taýly aımaqtaǵy 14 aýyldyń turǵyndary evakýatsııalandy. Lofý aýylynda keminde 20 úı qıraǵany habarlandy.

Úkimet ókilderi belsendi órtter 24 shilde kúni tańerteń aýyzdyqtalǵanyn málimdegenimen, sodan beri keıbir aımaqtarda órt qaıta tutanǵan. Atap aıtqanda, keshe tús aýa batystaǵy Pafos aýdanynda orman órti taǵy da tirkeldi.

Mamandar kúndiz ekpindi jel men aptap ystyqqa ulasyp, jaǵdaıdyń odan da qaýipti bolatynyn eskertti. Kóptegen jol jabyq kúıde, qutqarý jumystary toqtaǵan joq. Órtpen 250-den astam órt sóndirýshi kúresip jatyr. Sondaı-aq 18 ushaq áýeden qoldaý kórsetedi.

2 kún buryn bastalǵan orman órti kem degende 120 sharshy shaqyrym aýmaqty sharpyǵan. Bul jer aýmaǵy araldyń jer kóleminiń 1%-dan astamyn quraıdy. Sońǵy iri órt 1974 jyly araldy túrik áskerleri basyp alǵan kezde bolǵan. Ol kezde shamamen 260 sharshy shaqyrym aýmaq órtengen.

Sheteldik kómek

Kıpr úkimetiniń baspasóz hatshysy Konstantınos Letımbıotıs bılik basqa elderden kómek suraǵanyn aıtty.

– Ispanııa 2 órt sóndirý ushaǵyn jiberip jatyr. Iordanııa 2 tikushaqpen kómek kórsetýge ýáde berdi. Ulybrıtanııa da órtti sóndirýge áskerı ushaǵyn jumyldyrdy. Al, Izraıl óz ushaǵyn jiberetinin habarlady, - dedi baspasóz hatshysy.

Eske sala keteıik, AQSh osy jyldyń eń úlken orman órtimen kúresip jatyr.