Qymbat dızel Germanııadaǵy tasymal sektoryn daǵdarysqa ushyratyp otyr

ASTANA. KAZINFORM — Germanııada júk tasymaly salasynda ondaǵan myń jumys ornynyń joıylý qaýpi týraly eskertildi, dep habarlaıdy BILD.

Germanııa júk tasymaldaýshylarynyń salalyq birlestiginiń basshysy Dırk Engelhardt janarmaı baǵasynyń ósýine baılanysty 100 myńǵa deıin jumys orny qaýip tóngenin málimdedi — bul eldegi júk kóligi júrgizýshileriniń shamamen 15%-yn quraıdy.

Onyń aıtýynsha, tasymaldaý kompanııalary shyǵyndardyń kúrt artýy men ótimdilikti joǵaltý qaýpine tap bolyp otyr.

Engelhardt bul jaǵdaıdy Iran tóńiregindegi qaqtyǵys aıasynda dızel baǵasynyń qymbattaýymen, sondaı-aq janarmaıǵa salynatyn ekologııalyq alymdardyń qosarlanǵan júktemesimen baılanystyrdy. Sonyń saldarynan, onyń baǵalaýynsha, ár lıtr janarmaı baǵasyna qosymsha 17–20 tsent qosylady. Ol salada jeke kompanııalardan «dabyl belgileri» kóbeıip jatqanyn atap ótti.

Birlestik basshysy úkimetti shuǵyl sharalar qabyldaýǵa shaqyryp, Polsha tájirıbesin mysalǵa keltirdi. Bul elde janarmaıǵa salynatyn salyq tómendetilip, baǵaǵa shekteýler engizilgen.

Engelhardtyń aıtýynsha, dızel baǵasyndaǵy aıyrmashylyq shamamen lıtrine 29 tsentke jetedi, bul polıak tasymaldaýshylaryna aıtarlyqtaı artyqshylyq beredi. Sonymen qatar, sheteldik júk kólikteri Germanııa aýmaǵyn janarmaı quımaı-aq kesip ótip, joǵary baǵadan jaltara alady. 

Aıta ketelik Germanııada janarmaıdyń qymbattaýyna baılanysty avtobandarda jyldamdyqty shekteý usynyldy.