Kım Chen Yn ıadrolyq arsenal men barlaý spýtnıkteri flotyn damytýǵa buıryq berdi
Koreıa Eńbek partııasynyń Bas hatshysy Ortalyq Komıtet plenýmynda qazirgi zamanǵy soǵys erekshelikterine sáıkes ushqyshsyz basqarylatyn apparattardyń barlyq túrin jáne qýatty radıoelektrondyq soǵys júıelerin jasaý men óndirýdiń mańyzyn atap ótti. Kazinform agenttigi bul týraly Euronews-ke silteme jasap habarlaıdy.
Soltústik Koreıa kelesi jyly taǵy úsh barlaý spýtnıgin ushyrýdy josparlap otyr.
Bul týraly Soltústik Koreıanyń kóshbasshysy Kım Chen Yn Koreıanyń jumysshylar partııasy OK otyrysynda málimdedi. Ol AQSh, Japonııa jáne Ońtústik Koreıanyń úshjaqty yntymaqtastyǵyn synap, onyń «Koreıa túbegindegi jaǵdaıdy qaýipti jaǵdaıǵa aparyp soǵatynyna» senim bildirdi.
21 qarashada Soltústik Koreıa «Mallıgen-1» alǵashqy barlaý spýtnıgin ushyrdy. 2 jeltoqsanda KHDR barlaý spýtnıgin paıdalaný basqarmasy jumysqa kiristi. Koreıanyń Ortalyq telegraf agenttigi habarlaǵandaı, «Mallıgen-1» óz mıssııasyn 1 jeltoqsanda tolyqtaı oryndaı bastaıdy. Synaq operatsııasy aıasynda spýtnık Aq úıdiń, Pentagonnyń, sondaı-aq AQSh, Koreıa Respýblıkasy jáne Japonııadaǵy birqatar áskerı nysandardyń sýretterin jiberdi.
Sondaı-aq Kım Chen Yn Soltústik Koreıanyń ıadrolyq arsenalyn kóbeıtýge buıryq berdi. Onyń atap ótýinshe, 2024 jyly ıadrolyq qarýdy óndirý josparyn júzege asyrý úshin «qajyrly kúres bastalatynyn» jáne jappaı qyryp-joıý qarýynyń osy túrin óndirýdi dáıekti túrde arttyrýǵa múmkindik beretin «senimdi negiz qurylady».
