Kıik eti qaýipti me — mınıstrlik jaýaby

ASTANA. KAZINFORM — Áleýmettik jeliler men BAQ-ta kıik etin tutyný kezinde juqtyrý qaýpi týraly jarııalanymdarǵa baılanysty Aýyl sharýashylyǵy mınıstrligi resmı túsinik berdi.

Mınıstrlik taratqan aqparatta aıtylǵandaı, kıik sanyn retteý jumysyn «Ohotzooprom» mekemesiniń qyzmetkerleri júzege asyrady. Soıylǵan kıik ushalary muzdatqyshqa salynyp, soıý pýnktterine jetkiziledi.

— Janýarlardyń asa qaýipti aýrýlaryn (usaq kúıis qaıyratyn janýarlardyń obasy, aýsyl, brýtsellez, pasterellez, sibir jarasy jáne taǵy basqa) boldyrmaý maqsatynda kıikterdiń popýlıatsııasyna Ulttyq veterınarııa referenttik ortalyǵy turaqty túrde epızootııalyq monıtorıng júrgizedi. Sonymen qatar, kıikterdiń jaıylymy men sýattarda veterınarııalyq qyzmet turaqty túrde monıtorıngtik zertteýler júrgizip otyrady. Kıikterdi soıý jáne bıologııalyq qaldyqtardy zalalsyzdandyrý boıynsha tıisti normatıvter qabyldanǵan. 2023 jylǵy 27 qarashada QR ST «Saıǵaq eti buqtyrylǵan. Tehnıkalyq sharttar» jáne QR ST «Saıǵaq eti — tutas jáne jartylaı ushalar. Jalpy tehnıkalyq sharttar» ulttyq standarttary bekitilgen, — delingen habarlamada.

Qazir 6 óńirde 24 kıik soıý pýnkti bar. Soıýǵa arnalǵan obektiler veterınarııalyq-sanıtarııalyq talaptarǵa saı (mal soıýǵa arnalǵan arnaıy bólmeler, tońazytqysh kameralar, ushalardy ilýge arnalǵan quraldar, sýmen jabdyqtaý jáne t. b.). Ushalar soıý oryndaryna jetkizilgen soń, olar veterınarııalyq dárigerlerdiń baqylaýynan ótip, veterınarııalyq-sanıtarııalyq saraptama jasalady.

— Kıik etine mindetti zertteý júrgiziledi, onyń ishinde usha, ishki aǵzalary men basynyń organoleptıkalyq qaraýdan ótedi. Barlyq qoljetimdi lımfa túıindi jaryp, ishki aǵzalary tilip tekseriledi, sonymen qatar qaınatý synamasy, fınnozǵa (tsıstıtserkoz) zerttelip, jalpy radıatsııalyq fondy anyqtaıdy. Ushanyń veterınarııalyq talaptarǵa sáıkestigi anyqtalǵan soń, et ári qaraı bólshektelip, óńdeledi, al qaldyqtar zalalsyzdandyrylady. Kıik eti qoldanysqa jiberer aldynda veterınarııalyq dárigerdiń anyqtamasy beriledi. Ol qujat ónimniń shyqqan jerin, qaýipsizdigin jáne sapasyn rastaıdy, — dep habarlaıdy vedomstvo.

Eskeretin jaıt, kıik eti veterınarııalyq-sanıtarııalyq qaýipsizdik talaptaryna saı bolýy qajet. Qazaqstan Respýblıkasynyń «Veterınarııa týraly» Zańynyń 22-babyna sáıkes, janýarlardan alynatyn ónimder men shıkizatty veterınarııalyq-sanıtarııalyq saraptamasyz ótkizýge tyıym salynady.

— Sonymen qatar, saýda nysandarynda veterınarııalyq ınspektorlar kúndelikti baqylaý júrgizedi. Olar veterınarııalyq anyqtamanyń jáne soıý ornynyń tańbasynyń bolýyn, ónimdi tasymaldaý kezinde temperatýralyq rejımniń saqtalýyn, zerthanalyq baqylaý nátıjelerin tekseredi. Osyǵan baılanysty, Veterınarııalyq baqylaý jáne qadaǵalaý komıteti tutynýshylarǵa kıik etin arnaıy belgilengen oryndardan jáne veterınarııalyq ilespe qujattar bolǵan jaǵdaıda ǵana, tamaqtaný jáne veterınarııalyq-sanıtarııalyq qaýipsizdik talaptaryna sáıkes satyp alýdy usynady, — dep túsindirdi Aýyl sharýashylyǵy mınıstrliginen.

Aıta ketsek, birer kún buryn Aýyl sharýashylyǵy mınıstrligi kıik etiniń baǵasyn jarııalady. Vedomstvo bir keli kıik etin 1600 teńgeden usynyp otyr. 

Buǵan deıin habarlaǵanymyzdaı, batysqazaqstandyq ǵalymdar kıik etinen shujyq jasap shyǵardy.