Kıik atýǵa ruqsat berile me - BQO sharýalaryn mazalaǵan másele bıyl sheshiletin boldy

ORAL. QazAqparat - Shilde aıynan bastap Batys Qazaqstanda «Bókeıorda» memlekettik tabıǵı rezervaty respýblıkalyq memlekettik mekemesi men «Aşyózek» memlekettik tabıǵı qaýmaly qurylady. Bul týraly atalǵan óńirge jumys saparymen barǵan Ekologııa vıtse-mınıstri Álııa Shalabekova aıtty, dep habarlaıdy QazAqparat.

Ekologııa mınıstrliginiń ókilderi BQO-ǵa issaparmen bardy. Onda Jánibek aýdanynyń jergilikti sharýalarymen kezdesti.

Jıynda sońǵy jyldary kóbeıgen kıik máselesi kóterildi. Óıtkeni Oral popýlıatsııasyndaǵy kıikt sany 800 myńnan asqan.

Turǵyndar tórt túliktiń jaıylymynda kógal qalmaıtynyn aıtady.

«Kıikterdiń kóptiginen biz, sharýalar japa shegip jatyrmyz. Jaıylymǵa mıllıonǵa jýyq kıik kelse, ol jerde eshqandaı shóp qalmaıdy. Bulardyń sany aıtarlyqtaı kóp. Qalaıda azaıtý kerek»,- dedi Jánibek aýdany Kúıgen kól aýylynyń turǵyny Boranbaı Aıtqalıev.

Ekologııa mınıstriniń orynbasary Álııa Shalabekova kıikterdi aýlaý úshin bıologııalyq negizdeme kerektigin aıtady.

Degenmen, osy máselege qatysty mınıstrlik tıisti jumys júrgizip jatyr.

Sondaı-aq, jıynda vıtse-mınıstr shilde aıynan bastap osy óńirde erekshe qorǵalatyn tabıǵı aýmaqtar qurylatynyn aıtady.

Osy arqyly Oral popýlıatsııasyndaǵy kıiktiń 250 myńǵa deıin basyn atalǵan aýmaqta ustap turý kózdelmek.

«Búgingi tańda respýblıkalyq mańyzy bar erekshe qorǵalatyn tabıǵı aýmaqtar qurý týraly qaýly shyqty. Qaýmaldyń aýdany 314504,1 gektardy, rezervatynyń aýdany 343040,1 gektardy quraıdy. Batys Qazaqstan oblysynyń Bókeı ordasy, Jánibek, Kaztalov, Jańaqala aýdandarynyń aýmaǵynda ornalasatyn bolady. Munda kıiktiń 250 myń basyna deıin saqtalady»,- dedi QR Ekologııa, geologııa jáne tabıǵı resýrstar vıtse-mınıstri Álııa Shalabekova.

Aıta keteıik, Qazaqstan aýmaǵynda Betpaqdala, Oral jáne Ústirt sııaqty kıikterdiń álemdik popýlıatsııasynyń 95% astamy mekendeıdi.

Eske salsaq, 2016 jyly elimizde jalpy kıik sany 100 myńnan sál asqan.

Tabıǵat saqshylarynyń júıeli jumysynyń nátıjesinde qazir olardyń sany bir mıllıon bes júz myńǵa jýyqtaǵan.