QHL: «Barys» «Vıtıaz» komandasynan óz aıdynynda jeńilip qaldy
ASTANA. KAZINFORM — Qazaqstandyq «Barys» komandasy búgin, 28 qyrkúıekte Qurlyqtyq hokkeı lıgasyndaǵy kezekti oıynyn elordada Reseıdiń «Vıtıaz» (Podolsk) komandasyna qarsy ótkizdi.
Kezdesý barysynda komandalar tartysty oıyn kórsetti. Birinshi kezeńde esep ashylǵan joq.
Ekinshi kezeńde «Vıtıaz» sapynan Ivan Chehovıch 33-mınýtta mergendik tanytsa, oıynnyń bitýine nebári 16 sekýnd qalǵanda Nıkolıa Baptıst qorytyndy esepti belgiledi.
Osylaısha «Barys» qarsylasyna 0:2 esebimen ese jiberip, jańa maýsymdaǵy segizinshi jeńilistiń aşy dámin tatty.
Eki komanda buǵan deıin 35 márte kezdesken. Onyń 22-i elordalyq klýbtyń basymdyǵymen aıaqtalsa, qalǵan oıynda reseılik komanda jeńiske jetken.
Keıingi bes kezdesýdiń barlyǵynda qazaqstandyq klýb atalǵan qarsylasyna ese jiberdi. 21 qyrkúıekte «Barys» atalǵan qarsylasynan (1:4) jeńilip qalǵan edi.
Endi qazaqstandyq komanda budan keıingi taǵy bir oıynyn Astanada ótkizip, 30 qyrkúıekte «Torpedo» (Nıjnıı Novgorod) komandasymen sheberlik baıqasady.
Eske salsaq, budan buryn «Barys» elordada Reseıdiń «Sochı» komandasynan basym tústi.
