KHDR gıperdybystyq zymyrandy sátti synaǵanyn habarlady
ASTANA. KAZINFORM – Phenıanda gıperdybystyq qarýdy jasaýdaǵy jańa jetistikter týraly habarlady. KHDR bıliginiń habarlaýynsha, gıperdybystyq manevrli basqarylatyn oqtumsyǵy bar ortasha qashyqtyqqa ushatyn zymyran synaqtan sátti ótti. Bul týraly DW habarlady.
Ózin-ózi ıadrolyq derjava dep jarııalaǵan Soltústik Koreıa gıperdybystyq oqtumsyǵy bar orta qashyqtyqqa ushatyn zymyrandardy jasaýda jańa progress týraly habarlady.
«Jeksenbi kúni KHDR-nyń zymyran jasap shyǵarý Bas basqarmasy gıperdybystyq manevrli basqarylatyn oqtumsyǵy bar qatty otyndy ortasha-alys radıýsta áreket etetin ballıstıkalyq zymyrandy synaqtan ótkizdi. Ushyrý sátti ótti», - dep habarlady dúısenbi, 15 qańtarda Soltústik Koreıanyń BAQ.
KHDR-daǵy zymyran synaqtary Ońtústik Koreıa men Japonııada tirkeldi. Ońtústik Koreıa áskerıleriniń málimetinshe, ortasha qashyqtyqqa ushatyn zymyran shamamen myń shaqyrym ushyp, Japon teńizine qulaǵan. Ońtústik Koreıa synaqty aıyptap, ony Phenıanǵa kez kelgen qashyqtyqtaǵy ballıstıkalyq zymyrandardy synaqtan ótkizýge tyıym salatyn BUU qararlaryn aıqyn buzý dep atady. Mundaı zymyrandar ıadrolyq oqtumsyqtarmen jabdyqtalýy múmkin.
Ońtústik Koreıanyń «Renhap» aqparat agenttiginiń habarlaýynsha, Phenıan ótkizgen jańa zymyran synaǵy KHDR AQSh-tyń qurlyqtyq aımaǵyn soǵýǵa qabiletti «Hvason-18» qatty otyndy kontınentaralyq zymyranyn synaqtan ótkizgen 18 jeltoqsannan keıin birinshi synaq bolyp otyr.
