QHA jastarǵa qandaı qoldaý kórsetpek
«Prezıdent jastardyń startaptaryn qoldaýǵa ýáde berdi. Osy maqsatta árbir jas órenge óziniń jeke «tabys tarıhyn» qurýyna múmkindik berilgeli otyr. Sonymen birge «Prezıdenttik kadrlyq rezerv» qurylady. QHA keńesiniń keńeıtilgen otyrysynda biz qurylymdarymyzǵa osy másele boıynsha óz usynystaryn berýdi ótindik. Biz QHA jastarynyń ishinen kadrlyq rezervti qalyptastyrýǵa nıettimiz. Olarmen jumys isteı otyryp, jastardy odan ary ilgeriletýge yqpal etpekpiz», - dedi Janseıit Túımebaev Parlament Májilisinde ótip jatqan Qazaqstan halqy Assambleıasynyń depýtattyq tobynyń otyrysynda.
Janseıit Túımebaevtyń aıtýyna qaraǵanda, Assambleıa óz tarapynan QHA «Jańǵyrý joly» jastar qozǵalysyn damytýdyń Jol kartasyn júzege asyrýǵa erekshe nazar aýdarady.
«Biz jastardy Assambleıanyń barlyq is-sharalary men jobalaryna tartatyn bolamyz, Qazaqstannyń 100 jańa esimine engen tulǵalarynyń tabys tarıhyn ilgeriletýdi jalǵastyramyz. Árbir óńirde jáne árbir Dostyq úıinde volonterlik jelilerdi damytýdy yntalandyrý kerek. Árbir Dostyq úıi eriktilik ortalyǵyna aınalýy tıis. Respýblıkalyq etnomádenı birlestikterde jastarmen jumys erekshe orynda bolýy tıis. Jas kóshbasshylardy qalyptastyrý, olardy alǵa jyljytý qajet», - dedi ol.
Eske sala ketsek, Parlament Májilisinde «QHA-nyń Májilistegi depýtattyq tobynyń Q.K.Toqaevtyń saılaýaldy baǵdarlamasynan jáne QR-nyń saılanǵan Prezıdenti qyzmetine resmı kirisý rásiminde sóılegen sózinen týyndaıtyn mindetteri týraly» taqyrybynda otyrys ótip jatyr. Otyrysqa májilismender, QR Prezıdenti Ákimshiliginiń jaýapty qyzmetkerleri, mınıstrlikter ókilderi, memlekettik uıymdardyń qyzmetkerleri, BAQ ókilderi qatysýda.