QHA-nyń 30 jyldyq emblemasy beınelengen tý ǵaryshqa alǵash ret kóteriledi
QYZYLORDA. KAZINFORM — Búgin Qyzylordadaǵy «Dostyq úıinde» «Syr eli – dostyq mekeni» atty respýblıkalyq Assambleıa jastary forýmynyń plenarlyq otyrysy ótti.
Forýmǵa Parlament Senatynyń depýtaty, jastar janashyrlary Nýrııa Nııazova, Ǵylym jáne bilim mınıstrligi Joǵary jáne joǵary oqý ornynan keıingi bilim komıteti tóraǵasynyń orynbasary Aqerke Abylaıhanqyzy, «Assambleıa jastary» respýblıkalyq qoǵamdyq birlestiginiń tóraǵasy Tımýr Jumyrbaev, barlyq óńirden kelgen Assambleıa jastarynyń kóshbasshylary qatysty.
Aımaq basshysy Nurlybek Nálibaev forým qatysýshylaryn Qazaqstan halqy Assambleıasynyń 30 jyldyǵymen quttyqtap, basqosý jumysyna sáttilik tiledi.
— Barshańyzdy birliktiń uıytqysy bolyp, elimizdegi etnosaralyq dostyq pen toleranttylyqtyń úlgisin álemge tanytqan Qazaqstan halqy Assambleıasynyń 30 jyldyq merekesimen shyn júrekten quttyqtaımyn! Búgin ózderińizben Qazaqstan halqy Assambleıasynyń 30 jyldyǵyna arnalǵan «Syr eli — dostyq mekeni» atty forýmda júzdeskenime qýanyshtymyn!
Prezıdentimiz Qasym-Jomart Kemeluly «Otanshyldyq, adamgershilik, bilimpazdyq, naǵyz maman bolý, únemshildik, eńbekqorlyq, el men jerge janashyrlyq sııaqty asyl qasıetter bárinen bıik turýǵa tıis. Osyndaı izgi qasıettiń bárin boıyna sińirgen jandy Adal azamat degen bir aýyz sózben sıpattaýǵa bolady. Ádiletti Qazaqstandy qurý úshin árbir otandasymyz adal azamat bolýǵa umtylýy qajet» degen bolatyn.
Syr óńirinde ár salada, atap aıtqanda, bilim, ǵylym, jýrnalıstıka, qoǵamdyq qyzmet, sport, medıtsına, mádenıet, kásipkerlik, óndiriste tabysty eńbek etip, joǵary kórsetkishterge jetken jastarǵa jyl saıyn «Syr úmiti» oblystyq jastar syılyǵy tabystalyp keledi. Baspana máselesin sheshý úshin 2023 jyldan beri «Syr jastary» turǵyn úı ıpotekalyq baǵdarlamasy júzege asyp jatyr. Oǵan jyl saıyn jergilikti bıýdjetten «Otbasy bank» turǵyn úı qurylys jınaq banki» arqyly kredıt berýge 1 mlrd 200 mln teńge bólinedi.
Assambleıanyń mereıli jyly aıasyndaǵy qýanyshty jańalyq — Qyzylorda qalasynda jańadan «Dostyq úıi» salynyp jatyr. Bul birlik pen yntymaqty nyǵaıtýǵa atsalysqan etnomádenı birlestikterge arnalǵan, barlyq qajettiliktermen qamtamasyz etilgen zamanaýı ǵımarat bolady. Taǵy bir erekshe jańalyǵymyz, aldaǵy 1 mamyr — Qazaqstan halqynyń birligi merekesi kúni oblys ortalyǵynan «Shyǵarmashylyq akademııasy» ashylady, — dedi Nurlybek Nálibaev.
Jıynǵa qatysýshylar Nýrııa Ismagılqyzy, Aqerke Abylaıhanqyzy jáne Tımýr Ǵabdýlulynyń atqarylǵan jumystar men aldaǵy mindetterge arnalǵan baıandamalaryn tyńdady.
Erteń qonaqtar Baıqońyr ǵarysh aılaǵyna ekskýrsııaǵa baryp, zymyran ushyrylymyn tamashalaıdy. Baıqońyr mýzeıinde ǵarysh salasynyń damý kezeńderimen, elimizdiń ǵaryshtyq jetistikterimen, tuńǵysh ǵarysh aılaǵynyń tarıhymen tanysady. Qazaqstan Halqy Assambleıasynyń jáne Assambleıa jastarynyń týlary ǵaryshqa jiberý úshin resmı tapsyrylady. Osylaısha Qazaqstan halqy Assambleıasynyń 30 jyldyq emblemasy beınelengen tý ǵaryshqa alǵash ret kóteriledi.