«Kezdesý kimniń paıdasyna sheshilmek?» - baspasózge sholý
*** Keshe elimizde ǵasyrdyń ǵalamaty deýge laıyqty ıgilikti iri is jerine jetkizildi. Arqa tósi men elimizdiń batys qıyryn jalǵastyrǵan jańa temirjol jelisiniń jalpy uzyndyǵy 1200 shaqyrymnan asady. Dál osy jaıt arqaý bolǵan maqala «Egemen Qazaqstan» gazetiniń búgingi sanynda «Keleshekti kemeldendiretin kúrejoldar» degen taqyryppen berildi. Basylymnyń jazýynsha, tarıhı oqıǵaǵa balanǵan sharaǵa qatysqan el Prezıdenti N.Nazarbaev magıstraldiń ashylýyn jyldyń eń mańyzdy áleýmettik-ekonomıkalyq oqıǵasy dep atady. «Jezqazǵan - Beıneý jáne Arqalyq - Shubarkól joly birneshe óńir men búkil respýblıkanyń tirshiligine jan bitirip, ondaǵan jyldarǵa alǵa jeteleıdi. Biz táýelsizdiktiń barlyq kezeńinde temirjol qurylysyn toqtatqan joqpyz, qaıta údete tústik», - dedi Nursultan Nazarbaev. Budan soń telekópir arqyly Beıneý, Shalqar, Sekseýil, Arqalyq jáne Jezqazǵan stansalarynyń basshylary júkter tıelgen alǵashqy poıyzdardyń saparǵa daıyn ekenin málim etti. Memleket basshysy temirjoldardyń qoldanysqa engizilýine ruqsat berip, qos iri kóliktik-logıstıkalyq jobany júzege asyrǵan temirjolshylar men qurylysshylardy eren eńbek jeńisterimen quttyqtady.
Atqarýshylyq is júrgizý qashanda sot oryndaýshylarynan zor jaýapkershilikti talap etetini anyq. Óıtkeni, qaryzdy óndirý týraly sot sheshimderin múltiksiz oryndaý ońaıǵa soqpaıtyny jáne belgili. Qyzmet tıimdiligin arttyrý maqsatynda bıyl qoldanystaǵy zańǵa ózgerister men tolyqtyrýlar engizildi. Engizilgen ózgerister sot oryndaýshylarynyń jumysyna qanshalyqty áser etti? Jarty jyl ishinde atqarý óndirisi organdarynda qandaı jańalyqtar boldy? Osyndaı ózekti saýaldarmen «Egemen Qazaqstan» gazeti Aqmola oblysy sot aktilerin oryndaý departamentiniń basshysy Moldabaı Ótepovti áńgimege tartqan. Basylymnyń tilshisiniń barlyq saýalyna tuşymdy jaýap bergen ol: «Iyǵynda aýyr júk bolsa da, alty aı ishinde Aqmola oblysynyń sot oryndaýshylary birtalaı istiń basyn qaıyryp úlgerdi. Sot arqyly kelip túsken 55 884 atqarý qujatynyń 45,6 paıyzyn tyńǵylyqty aıaqtap shyqty. Sonyń arqasynda 7 mıllıard teńgeden astam qaryz óziniń zańdy ıelerine qaıtaryldy. Sonymen qatar, ókiletti organdar tarapynan salynǵan 204 mıllıon teńge aıyppuldyń 189 mıllıon teńgesi respýblıkalyq bıýdjet kirisine óndirildi», - deıdi. Suhbat «Borysh. Ol báribir óndiriledi» degen taqyryppen berilgen. *** «Tamyzdyń 26 kúni ótetin «Eýrazııalyq úshtiktiń» (Qazaqstan, Reseı, Belorýs) sammıtine Ýkraına prezıdenti Petr Poroshenko da qatyspaq. Jalǵyz emes. Janyna ol da Eýrodaqtyq «úshtikti» ertpek. ıAǵnı úsh eýrokomıssar - Syrtqy ister boıynsha Ketrın Eshton, saýda salasynan Karel De Gıýht jáne energetık Gıýnter Ettınger», dep jazady «Aıqyn» gazeti senbilik sanyndaǵy «Kezdesý kimniń paıdasyna sheshilmek?» degen taqyryptaǵy maqalasynda. Basylymnyń jazýynsha, kezdesýde negizgi tilge tıek bolatyn áńgime ol -Ýkraınada júrip jatqan soǵysty toqtatýdyń áreketi. Odan keıin baryp Eýrodaq pen Reseı arasyndaǵy qalyptasqan ekonomıkalyq túıtkilderdi sheshý. Degenmen sammıttegi basty taqyryp - Ýkraına bolmaq. Lýkashenkonyń araǵaıyndyǵymen ótetin bul joǵarǵy deńgeıdegi kezdesýde Pýtın men Poroshenko júzbe-júz jolyǵyp, Ýkraınanyń ońtústik shyǵys aımaǵynda qalyptasqan jaǵdaıdy talqyǵa salmaq. Basylymǵa osy kezdesý jaıyndaǵy óz pikirin bildirgen saıasattanýshy Ázimbaı Ǵalı: «Bul kezdesýde úsh stsenarıı bolýy múmkin. Men solaı qarastyryp otyrmyn. Birinshisi - qazirgi jaǵdaı osylaısha qala beredi. Óıtkeni Batysqa soǵystyń órship ketpeýi jáne toqtap qalmaýy tıimdi. Osy arqyly AQSh bastaǵan alpaýyttar osyny jeleý etip, Reseıdi túrli sanktsııalarmen kóme bermek. Ekinshi stsenarıı- kezdesý eshqandaı nátıje bermeıdi. Reseı jasaqshylarǵa kómek berip, Ýkraınany qalaıda bólshekteýge tyrysady. Úshinshi stsenarıı boıynsha Nazarbaev pen Lýkashenko qalaıda Pýtındi beıbit kelisim jasaýǵa ıtermeleıdi», deıdi.
«Aıqyn» gazetiniń jazýynsha, Qazaqstanda jumysshy kásipter boıynsha kolledjderge túsý kezindegi baıqaý joıylady. Elimizde oqý oryndaryna qabyldaý barysynda 1 orynǵa birneshe talapkerdiń talasatyny málim. Sodan testileýde eń kóp bal jıǵandary, halyqaralyq jarys jeńimpazdaryna ótedi. Mundaı talastan kolledjder keleshekte bas tartpaq. Muny keshe Premerdiń orynbasary Gúlshara Ábdiqalyqova ustazdardyń dástúrli jalpyrespýblıkalyq «Tamyz keńesinde» jarııalady. Tıisti sheshim de qabyldanǵan. «Tehnıkalyq jáne kásiptik bilim berýde kepildendirý qaǵıdaty belgilendi. Sonyń aıasynda jumysshy kásipter boıynsha kolledjderge túsý kezindegi baıqaý joıylady. Osy maqsatta memlekettik tapsyrys kólemi ulǵaıady, jastardy qamtý arttyrylady. Bul jumys 2017 jylǵa deıin kezeń-kezeńmen júrgiziletin bolady». - dep málimdedi vıtse-premer. Maqala «Kásip úırengiń kelse, kolledjge tús!» degen taqyryppen berilgen.
