Keın Gardner: Qazaqstan boksshylary óte myqty ekenin bilemin
ASTANA. KAZINFORM — Anglııalyq kásipqoı boksshy Keın Gardner (17-4, 7KO) jáne Ońtústik Afrıka ókili Azınga Fýzıle (18-2, 12KO) Astanada ótken «Battle of the Brave» kásipqoı boks keshine arnalǵan baspasóz konferantsııasyna qatysyp, qazaqstandyq boksshylar týraly oıyn aıtty.
Keın Gardner qazaqstandyq boksshylardyń myqty ekenin aıtty.
- Sálem barshańyzǵa. Men Qazaqstan boksy týraly jaqsy bilemin, sizder bul sportta óte myqtysyzdar, keremet boksshylaryńyz kóp. Osynda kelgenime óte qýanyshtymyn. Jalpy, qazaq boksshylary óte myqty ekenin bilemin, - dedi ol.
Azınga Fýzıle 2014 jyly qazaqstandyq boksshydan jeńilip qalǵanyn eske aldy.
- Men Qazaqstan týraly eń alǵash ret 2014 jyly bildim. Sol jyly, qazaqstandyq qarsylaspen judyryqtasyp, jeńilis taptym. Iá, Qazaqstan boksynyń myqty ekeninen habarym bar, - dedi ońtústik afrıkalyq boksshy.
Eske sala ketsek, Jánibek Álimhanuly 5 sáýir kúni Astana qalasynda kezekti jekpe-jegin ótkizip, chempıondyq beldikterin qorǵaıdy. Kásipqoı boks keshi elordadaǵy «Barys arena» sport kesheninde ótedi.
Osyǵan deıin habarlaǵanymyzdaı, jeńilip kórmegen qazaqstandyq boksshy Sultan Zaýrbek (19-0, 13KO) Ońtústik Afrıka ókili Azınga Fýzılemen, al Batyr Júkembaev (23-1, 17KO) anglııalyq Keın Gardnermen qolǵap túıistiredi.