Keıingi 5 jylda ınternet-alaıaqtyqpen baılanysty qylmystar sany 40 ese ósti

ASTANA. QazAqparat – Sońǵy 5 jylda ınternet-alaıaqtyq qylmystarynyń sany 40 ese ósti. Bul týraly «Ashyq» NQA portalynda jarııalanǵan Qoǵammen áriptestikte qoǵamdyq qaýipsizdikti qamtamasyz etýdiń 2024-2028 jyldarǵa arnalǵan tujyrymdamasynda kórsetilgen, dep habarlaıdy QazAqparat tilshisi.

«Innovatsııalyq tehnologııalar men tsıfrlyq servısterdiń qarqyndy damýy, sondaı-aq azamattardyń qarjylyq saýattylyǵynyń jetkiliksizdigi jaǵdaıynda ınternet-alaıaqtyq keńinen taralýda. Keıingi 5 jyl ishinde olardyń sany 40 ese ósti. Atap aıtqanda 2018 jyly 517-den 2022 jyly 20,5 myńǵa deıin. Mundaı qylmystar ekonomıkaǵa ǵana emes, eldiń ulttyq qaýipsizdigine de orasan zor zııan keltiredi», - dep jazylǵan ashyq talqylaýǵa shyǵarylǵan qujatta.

Málim bolǵandaı, sońǵy 5 jylda ınternet-alaıaqtar azamattarǵa 22 mlrd teńgeden asa zalal keltirgen.

«5 jylda ınternet-alaıaqtyq nátıjesinde keltirilgen zalal somasy 22 mlrd teńgeden asady. Áıelder ásirese osal top bolyp tabylady jáne qylmystyń osy túrinen zardap shekkenderdiń jartysynan kóbin quraıdy. Olarǵa qatysty aýyr qylmystardyń 4 ese ósýi ınternettegi alaıaqtyqqa baılanysty. Urlanǵan aqsha halyqaralyq aýdarym servısteri arqyly alynady nemese krıptovalıýtaǵa aýdarylady. Fıshıngtik ınternet-resýrstar, sondaı-aq qońyraý shalýshynyń nómirin ózgertýge, qońyraý shalýshynyń daýysyn burmalaýǵa múmkindik beretin hakerlik baǵdarlamalar tanymal», - delingen mınıstrlik usynǵan aqparatta.