Keıingi 3 jylda izdeý salynǵan adamdar sany eki esege tómendedi – Bas prokýratýra
Quqyq qorǵaý organdarynyń birlesken jumysynyń nátıjesinde keıingi 3 jylda izdeýdegi tulǵalardyń sany 5 myńnan 2,5 myńǵa deıin, ıaǵnı eki esege tómendegeni atap ótildi, dep habarlaıdy QazAqparat QR Bas prokýratýrasynyń baspasóz qyzmetine silteme jasap.
Búgingi tańda 284 adam asa aýyr, 1553 adam aýyr, 574 adam ortasha jáne onsha aýyr emes qylmys jasaǵany úshin izdestirilýde.
2023 jyldyń basynan beri izdestirýge jarııalanǵan 684 adamnyń 473-i ustaldy, bul 70% quraıdy.
Reseı, AQSh, Túrkııa, BAÁ, Qyrǵyzstan, Ózbekstan jáne Ýkraınadan búgingi tańda elge 95 azamat qaıtaryldy.
Bul qylmystyq qýdalaý organdarynyń úılestirilgen qyzmeti, izdestirý derekqorlarynyń kúndelikti monıtorıngin uıymdastyrý jáne prokýrorlyq tekserýlerdi júrgizý, sondaı-aq halyqaralyq áriptestermen tyǵyz ózara is-qımyl nátıjesinde múmkin boldy.
Uıymdyq jáne quqyqtyq sharalar kesheninen basqa, qylmyskerlerdi ustaý úshin tsıfrlyq tehnologııalar belsendi túrde engizilýde. Bet-álpetti tanýdyń otandyq algorıtmi jasaldy, onyń kómegimen 20-dan astam kúdikti anyqtaldy.
2022 jyldan bastap izdestirý jumysynyń tıimdiligin arttyrýdy qamtamasyz etetin «elektrondyq izdestirý jýrnaly» júıesi iske asyrylýda.
Sonymen qatar keńeste problemalyq máseleler, onyń ishinde shet memleketterdiń aýmaǵynda qylmyskerlerdi ustaýǵa tartylǵan polıtsııa qyzmetkerleriniń shtat sanyn kóbeıtý, sondaı-aq izdeýdegi adamdardan is júrgizý shyǵyndaryn óndirip alý qajettigi aıtyldy.
Shara sońynda qylmystyq qýdalaý organdarynyń basshylary men oblys prokýrorlaryna qylmyskerlerdi izdestirý jáne ekstradıtsııalaý jónindegi jumysty kúsheıtý usynyldy.
«Bas bostandyǵynan aıyrýǵa baılanysty emes bultartpaý sharasy taǵaıyndalǵan kúdiktilerdiń tergeý organdary men sottarǵa kelýinen jaltarýǵa jol bermeýge baǵyttalǵan uıymdastyrýshylyq-quqyqtyq jáne ózge de sharalardy qabyldaý tapsyryldy. Jalpy qylmyskerlerdi izdeý jáne ustaý jumystary jalǵasýda»,-delingen Bas prokýratýranyń baspasóz qyzmeti taratqan aqparatta.
