Keı dırektorlar qarajat únemdeıdi – Baǵdat Mýsın mektepterdegi ınternet sapasy týraly

ASTANA. QazAqparat – Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın keıbir mekteptegi sapasyz ınternettiń sebebin aıtty, dep habarlaıdy QazAqparat tilshisi.

Mektepterdegi ınternet máselesine qatysty jaǵdaı belgili. Eger kez kelgen uıym ınternetke naryqtyq baǵamen tóleýge daıyn bolsa, bul rette jyldamdyǵy joǵary ınternet tartylady. Atap aıtqanda, tıisti uıym nemese zańdy tulǵa joǵary tarıf tólese, onda operatorlar olarǵa qyzmet kórsetýge daıyn ekeni anyq, -

dedi B. Mýsın Májilistegi Úkimet saǵatynda depýtattar suraǵyna jaýap bere otyryp.

Osy oraıda, ol mektepterdegi jyldamdyǵy nashar ınternet máselesine toqtaldy.

Mektepterdegi jaǵdaıǵa toqtalsaq, jaqynda Úkimet otyrysynda osy máseleni talqylap, ákimdikterge naqty tapsyrma berdik. Internet boıynsha bıýdjetti mektepterge arnap eseptegende, standart boıynsha 20 Mbıt-ke jetedi. Al dırektor qarajat únemdep, sekýndyna 8 Mbıt úshin tóleıdi. Osy oraıda, operatorlar oǵan 8 Mbıt aýqymynda qyzmet kórsetedi. Ekinshiden, mektep ishindegi ınternet jelisi tıisti deńgeıde tartylmaǵan, ıaǵnı operator modemdi tek bir kompıýterge ornatady. Bul turǵyda negizinen býhgalter men dırektordyń kabınetine qoıylady da, búkil mektep aýmaǵynda ınternet qamtamasyz etilmeıdi, -

dedi mınıstr.

Budan buryn habarlanǵandaı, Baǵdat Mýsın sapasyz baılanys pen ınternet úshin operatorlar qomaqty somada aıyppul tólep jatqanyn aıtty.