Kentaýdyń eks-ákimi Rashıd Aıýpov elordada tergeý ızolıatorynda otyr

ASTANA. QazAqparat – Kentaý qalasynyń burynǵy ákimi Rashıd Aıýpovtyń ótken jylǵy qazan aıynan bastap tergeý ızolıatorynda qamaýda otyrǵany belgili boldy. Aqparatty Qylmystyq atqarý júıesi komıtetiniń baspasóz qyzmeti rastady, dep habarlaıdy QazAqparat tilshisi.

«R. Aıýpov 17.10.2022 jyldan bastap Astana qalasy boıynsha qylmystyq atqarý júıesi departamentiniń №64 tergeý ızolıatorynda qamaýda otyr. Qazir oǵan qatysty QR Qylmystyq kodeksiniń 28-baby 4-bóligi, 312-baby 5-bóligi boıynsha sotqa deıingi tergeý júrip jatyr», - delingen resmı habarlamada.

Sondaı-aq, komıtetten tergeý ızolıatorlarynda qamaýda otyrǵandardyń qoldanystaǵy zańnamaǵa sáıkes quqyǵy men mindeti bary aıtyldy. Sondaı-aq, olardyń mekeme kitaphanasynan kitap alýǵa, advokattarmen, qoǵamdyq qorǵaýshylar jáne týystarymen kezdesýge múmkindigi bar.

Eske salsaq, R. Aıýpov ótken jyly naýryzda Túrkistan oblysy Kentaý qalasynyń ákimi bolyp taǵaıyndalǵan edi. Al, 2019 jyldyń shilde aıynan 2021 jylǵa deıin Túrkistan qalasynyń ákimi qyzmetin atqardy.