Kentaýdyń jylytý maýsymyna daıyndyǵy qalaı
TÚRKІSTAN. KAZINFORM - Qala turǵyndary úshin ózekti bolyp kelgen jylýmen qamtý máselesi ońtaıly sheshilip jatyr.
Byltyr №5 jylý-energo ortalyǵyndaǵy alty qazandyqty qaıta jańǵyrtýǵa qarjy bólinip, onyń beseýinde jumystar tolyq aıaqtaldy. Sonyń nátıjesinde Kentaý qalasy 2024–2025 jylǵy jylytý maýsymynda normatıvke sáıkes jylýmen qamtyldy. Sondaı-aq №7 qazandyqtyń qurylys-montajdaý jumystary da bitip, aldaǵy maýsymda ol 72 saǵattyq synaqtan ótkiziledi.
Kentaý qalasy ákimdiginiń málimetinshe, qazandyqtardy qaıta qurýmen qatar, magıstraldyq jáne ishki oramdyq jylý jelilerin kezeń-kezeńimen jańartý qolǵa alynyp otyr. Atap aıtqanda, №5 JEO-nyń №7–12 qazandyqtary tolyq jańǵyrtylyp, olardyń tozý deńgeıi 87,2 paıyzdan 25 paıyzǵa deıin tómendedi. Bul – turǵyndardy úzdiksiz ári sapaly jylýmen qamtýǵa múmkindik beredi.
Qaladaǵy jylý jelileriniń jalpy uzyndyǵy 169 shaqyrymdy quraıdy. Onyń ishinde magıstraldyq jeliler – 38,1 shaqyrym, al ishki oramdyq qubyrlar – 130,9 shaqyrym. Ótken jyly magıstraldyq qubyrdyń 6,6 shaqyrymy aýystyrylsa, bıyl 14,5 shaqyrymyn qaıta qurýǵa jobalyq-smetalyq qujattama ázirlenip, qurylys-montaj jumystary bastaldy.
Sonymen birge, ishki oram jelilerin kezeń-kezeńimen jańartý jospary júzege asyp jatyr. Birinshi kezeńde 22,2 shaqyrymdy quraıtyn jylý júıesiniń 6 shaqyrymy qaıta jańartyldy. Al ekinshi kezeńde 44,2 shaqyrymdyq jelini aýystyrý kózdeldi.
Eske sala keteıik, buǵan deıin Premer-mınıstr jylý berý maýsymyna daıyndyǵy tómen óńirlerdi synaǵanyn jazǵan edik.