Kentaý jylý ortalyǵy turaqty rejımde jumys istep tur
Kentaý qalasyndaǵy № 5 jylý elektr ortalyǵy qalypty jumys istep tur. Jylý temperatýrasy +57-ni kórsetse, keri qaıtarý temperatýrasy + 41. Barlyq elektr-jylý jelileri qalpyna keltirildi. Táýlik boıy kezekshilik uıymdastyrylǵan, dep habarlaıdy óńirlik kommýnıkatsııalar qyzmetiniń baspasóz qyzmeti.
Mektepter men balabaqshalardyń rezervtik qazandyqtaryn qosý máselesi qaralýda.
Kúnniń kúrt sýýynan jáne jylý qubyrlaryndaǵy tempýratýranyń tómendeýinen qala ishindegi jylý qubyrlarynda aqaý paıda bolyp, turǵyndardy ábigerge salǵan bolatyn. Arnaıy brıgadanyń shuǵyl áreket etýinen jarylǵan qubyrlar qalypqa keltirildi. Qazirgi tańda qala turǵyndaryn tolyqtaı jylýmen qamtý maqsatynda jumys shtattyq rejımde júrýde.
Túrkistan oblysy ákiminiń birinshi orynbasary Zulpyhar Joldasov jáne Kentaý qalasynyń ákimi Jandos Tasov turǵyndarmen kezdesip, túsindirý jumystaryn júrgizýde.
Aıta keteıik, jeltoqsannyń 13-nen bastap daýyldy jel soǵyp, qalada jaryq óshken. Saldarynan 4 qazandyq sónip, jylý jelisiniń temperatýrasy 60-tan 27 gradýsqa deıin tómendedi. Odan keıin keı jerlerde ekpini 40 m/s jáne odan da joǵary bolatyn qatty jelden jylý júıesi 6 ret toqtap qaldy.
Jylý ortalyǵynda sońǵy ret kúrdeli jóndeý osydan 10 jyl buryn jasalǵan. Bıyl demeýshiler esebinen 4 qazandyq jóndeýden ótti. Áli eki qazandyq tolyq jańartylady.
«Kentaý servıs» MKK-si № 5 JEO kásiporny 1934 jyly qurylǵan. Qondyrǵylar 1952 jyly ornatylǵan. Jylý qubyrlarynyń uzyndyǵy 169 shaqyrymdy quraıdy. Kentaý qalasynda №5 JEO-ǵy 14 000 astam abonentti jylýmen qamtamasyz etedi. Onyń ishinde 350-ge jýyq kópqabatty úı, 100-den asa bıýdjettik mekeme, 401 kommertsııalyq nysan jáne 2 myńnan asa jeke sektordaǵy úı bar.
