Keltirilgen zalal óteldi: Qaırat Satybaldyǵa qatysty úkim ózgerdi
ASTANA. KAZINFORM – Óskemen qalalyq №2 soty Qaırat Satybaldynyń jazanyń ótelmegen bóligin neǵurlym jeńil jazaǵa aýystyrý týraly ótinishin qarady. Bul týraly sottyń baspasóz qyzmetinen málim boldy.
Sot úkimimen Satybaldy senip tapsyrylǵannyń múlkin jymqyrý, urlyq jasaý maqsatynsyz zalal keltirý boıynsha múlki tárkilenip, memlekettik qyzmet atqarý quqyǵynan 10 jylǵa deıingi merzimge aıyra otyryp, 6 jylǵa bas bostandyǵynan aıyrý jazasyna sottalǵan.
Ol óziniń ótinishhatynda jazasynyń ótelmegen bóligin neǵurlym jeńil túrine aýystyrý týraly ótinishhatyn berý úshin zańnyń barlyq talaptaryn oryndaǵanyn atap kórsetken.
«Sottalǵan ótinishhatyn qoldap, ony qanaǵattandyrýdy surady. Negiz retinde óziniń oń minezdemesin, úkim boıynsha zalaldyń ornyn toltyrǵanyn, sondaı-aq jalpy somasy 700 mlrd teńgeden astam múlikti jáne ózge de qarajatty óz erkimen memleketke qaıtarǵanyn aıtty. Túzeý mekemesiniń ókili sottalýshynyń ótinishhatyn qoldady.
Prokýror da Satybaldynyń ótinishhatyn qanaǵattandyrýdy surap, onyń jazany aýystyrý úshin barlyq sharttardy oryndaǵanyn, sondaı-aq memleketke óz erkimen ózge de múlikti bergenimen negizdedi», - delingen sot aqparatynda.
Atap aıtqanda, QK-niń 73-baby aýyrlyǵy ortasha qylmystar nemese aýyr qylmystar úshin sottalǵan adamdy jazanyń ótelmegen bóliginiń qalǵan bóligin mynadaı jaǵdaılarda neǵurlym jeńil jaza túrimen almastyrý múmkindigin kózdeıdi:
- jaza merziminiń keminde 1/3 bóligin ótegennen keıin;
- keltirilgen zalal tolyq ótelgen jaǵdaıda;
- jazany óteý tártibin qasaqana buzý jaǵdaılarynyń bolmaýy.
Satybaldy ortasha aýyr qylmys jáne aýyr qylmys jasaǵan. Ol jazanyń 1/3 bóliginen astamyn ótegen. Túzeý mekemesiniń ákimshiligi sottalǵanǵa qatysty oń sıpattamasyn bergen
«Qylmyspen keltirilgen zalal tolyǵymen ótelgen. Sot úkimimen óndirip alynǵan somalar (is júrgizý shyǵyndary, májbúrli tólem) tólengen.
Joǵaryda aıtylǵandardyń negizinde sot sottalýshynyń ótinishhatyn qanaǵattandyrdy jáne bas bostandyǵynan aıyrý túrindegi jazanyń ótelmegen bóligin 3 jyl 3 aı 7 kún merzimge bas bostandyǵyn shekteýge aýystyrdy», - dep atalyp ótken sot aqparatynda.
Q.Satybaldyǵa probatsııalyq baqylaý belgilendi. Turaqty jumysy bolmaǵan jaǵdaıda, sottalǵan jazany óteýdiń barlyq merzimi ishinde jyl saıyn 100 saǵattan májbúrli eńbekke tartylady.
Sot qaýlysymen oǵan mynadaı mindetter júktelgen:
- Sottyń qaýlysy turǵylyqty jeri boıynsha probatsııa qyzmetine zańdy kúshine engen kúnnen bastap 10 kún ishinde esepke qoıý úshin kelý, sottalǵan adamnyń (probatsııa qyzmetiniń) minez-qulqyn baqylaýdy júzege asyratyn ýákiletti memlekettik organdy habardar etpeı turaqty turǵylyqty jerin, jumysyn, oqýyn aýystyrmaý, basqa da mindetterdi oryndaý sottalǵandy túzeýge jáne onyń jańa qylmystyq quqyq buzýshylyqtar jasaýynyń aldyn alýǵa yqpal etedi.
Sot qaýlysy zańdy kúshine engen joq.
Budan buryn habarlanǵandaı, Qaırat Satybaldy isi boıynsha memleketke 732,8 mlrd teńgeniń aktıvteri qaıtaryldy.
Jaqynda ol memleketke taǵy 50 mlrd teńgeden astam aktıvin qaıtaratyny belgili boldy.
