Kelesi jyly ınflıatsııa birtindep baıaýlaıdy – Ulttyq bank
Onyń aıtýynsha, 2023-2025 jyldarǵa arnalǵan respýblıkalyq bıýdjetti daıyndaý barysynda Ulttyq bank aqsha-kredıt saıasaty men tólem balansy kórsetkishteriniń boljamyn ázirlegen.
«Boljam geosaıası jaǵdaıdyń nasharlaýyna baılanysty álemdik qarjy jáne taýar naryqtarynda bolǵan joǵary qubylmalylyq kezinde qalyptasyp otyr. Geosaıası daǵdarysqa baılanysty álemdik taýar naryǵyndaǵy teńgerimsizdik jahandyq ınflıatsııa jaǵdaıyn odan ári qıyndatty», - dedi Ǵ. Pirmatov Májilistiń búgingi otyrysynda.
Onyń aıtýynsha, kóptegen elderdegi ınflıatsııa birneshe onjyldyqtaǵy eń joǵary kórsetkishterge jetip, joǵary deńgeıde qalyp otyr.
Osyǵan baılanysty damyǵan jáne damýshy elderdiń ortalyq bankteri mólsherlemelerdi kóterip jatyr.
«Halyqaralyq valıýta qory bıylǵy qazan aıynda jahandyq ınflıatsııaǵa qatysty boljamdy kóterip, energııa tasymaldaýshylar men azyq-túlik baǵasynyń qosymsha daǵdarysy ınflıatsııanyń meıilinshe uzaq saqtalýyna ákelýi múmkin ekenin aıtty. Inflıatsııa azyq-túlik pen energetıka sektorynan tys shyǵyp barady. HVQ boljamdaryna sáıkes, álemdegi ınflıatsııa buryn kútkennen joǵary deńgeıde uzaǵyraq qalyp otyr jáne ol 2022 jyldyń sońynda 8,8% deıin jetýi múmkin. Odan keıin HVQ jahandyq ınflıatsııa 2023 jyly 6,5%-ǵa deıin jáne 2024 jylǵa qaraı 4,1% deıin báseńdeıdi dep boljady», - deıdi Ulttyq bank tóraǵasy.
Logıstıkalyq jáne óndiristik joldardyń ózgerýinen ishki naryqtardaǵy teńgerimsizdik kúsheıip, azyq-túlik pen shıkizattyń álemdik baǵasynyń ósýinen Qazaqstanda da ınflıatsııa ósken.
«Jyldyq mánde ınflıatsııa 17,7% jetti. Buǵan azyq-túlik ónimderi baǵasynyń 22,2% ósýi aıtarlyqtaı yqpal etti. Azyq-túlikke jatpaıtyn ınflıatsııa da ımporttyq taýarlardyń qymbattaýynan jáne olarǵa suranystyń joǵary bolýynan 17%-ǵa deıin qarqyn aldy. Aqyly qyzmet ınflıatsııasy 12,3% boldy. Kyrkúıek aıyndaǵy syrtqy shoktardy eskersek, 2022 jyldyń sońyna qaraı ınflıatsııa bizdiń tamyz aıyndaǵy boljamymyzdan asyp túsedi», - dedi spıker.
Sondaı-aq, qazir iske asyrylyp jatqan aqsha-kredıt saıasaty aıasynda 2023 jyly ınflıatsııa birtindep 7,5-9,5% deıin baıaýlaıdy. Álemdegi azyq-túliktiń qymbattaýynyń baıaýlaýy, negizgi saýda áriptes elderdegi ınflıatsııanyń baıaýlaýy da ınflıatsııany tejeıtin bolady.
«Shıkizat baǵasy joǵary bolǵan jaǵdaıda 2022 jyly tólem balansynyń shoty profıtsıtke aýysyp, 2023 jyly profıtsıt saqtalady dep kútiledi. Bıyl taýar eksportynyń ósýi munaı, metall, ýran men astyqtyń álemdik joǵary baǵasyna baılanysty bolady. 2023 jyly metall baǵasynyń tómendeýine baılanysty munaıǵa jatpaıtyn eksporttyń qysqarýy munaı óndirý kóleminiń 92,6 mln tonnaǵa deıin ósýi arqyly óteledi. Saqtalyp otyrǵan suranys pen fıskaldyq shyǵystar aıasynda taýar ımporty joǵary deńgeıde saqtalady dep kútilip otyr», - dedi Ǵalymjan Pirmatov.
Aıta keteıik, Májilis «2023-2025 jyldarǵa arnalǵan respýblıkalyq bıýdjet týraly» zań jobasyn maquldady.
Zań jobasyn talqylaýda Ulttyq ekonomıka mınıstri 2027 jylǵa deıingi munaı baǵasy, ınflıatsııa, eksport baǵalary men jalpy ishki ónim kólemine boljamdaryn aıtqan edi.