Kelesi jyly Belarýste UQShU-nyń birlesken jattyǵýlary ótedi

ASTANA. QazAqparat – Bitimgershilik kúshterdiń qazirgi kontıngenti kez kelgen qaýip-qaterge qarsy tura alady. Bul pikirdi Ujymdyq qaýipsizdik týraly shart uıymynyń Bas hatshysy Stanıslav Zas aıtty, dep habarlaıdy QazAqparat tilshisi.

«Sputnik» aqparattyq agenttiginiń baspasóz ortalyǵynda beınekópir formatynda ótken baspasóz máslıhatynda UQShU Bas hatshysy uıymnyń ótken jylǵy qyzmetiniń qorytyndylary, Ujymdyq Qaýipsizdik Keńesiniń Erevanda ótken kezekti sessııasynyń nátıjeleri týraly aıtyp berdi.

Jýrnalıster suraǵyna jaýap bere otyryp, S. Zas bitimgershilik kúshterdiń qazirgi kontıngenti kez kelgen qaýip-qaterge qarsy turýǵa jetkilikti ekenin atap ótti.

«Sonymen birge, biz qajet bolǵan jaǵdaıda bitimgershilik kúshterimizdiń úlken tobyn da jedel túrde tasymaldaı alatynymyzdy jaqsy túsinemiz. Ol úshin bizde bári bar», - deıdi UQShU Bas hatshysy.

S.Zas 2023 jyly Belarýs aýmaǵynda UQShU-nyń birqatar birlesken jattyǵýlary ótetinin eske saldy. Onyń aıtýynsha, oqý-jattyǵý barysynda uıymdy nyǵaıtý, onyń jaýapkershilik aımaǵynda turaqtylyq pen qaýipsizdikti qamtamasyz etý maqsatynda UQShU-ǵa múshe memleketterdiń birligin arttyrý jáne olardyń arasyndaǵy qaıshylyqtardy retteý boıynsha mańyzdy irgeli mindetter sheshiledi.

«Alǵash ret týyndaǵan problemalardy retteý jáne UQShU-ǵa múshe memleketterdiń aýmaǵynda turaqsyzdandyrýǵa jol bermeý mańyzdy basymdyq retinde tujyrymdalyp otyr», - dedi Stanıslav Zas.

Aıta keteıik, Qazaqstanda ár jyldary Úkimet basshysy, Memlekettik hatshy, Prezıdent Ákimshiliginiń basshysy sekildi joǵary laýazymdy qyzmetter atqarǵan Imanǵalı Tasmaǵambetov 2023 jyldyń 1 qańtarynan bastap UQShU-nyń Bas hatshysy bolady jáne bul qyzmetti úsh jyl atqarady.