Kelesi jyly eldegi 99 bazar jańǵyrtýdan ótedi
ASTANA. KAZINFORM – Saýda jáne ıntegratsııa mınıstrligi Saýda komıtetiniń tóraǵasy Aıdar Ádilbekov ortalyq kommýnıkatsııalar qyzmetinde ótken baspasóz máslıhatynda keler jyly eldegi 99 bazar jańǵyrtylatynyn aıtty.
«Jyl basynan beri saýda bazarlarynyń jaı-kúıin baǵalaý elimizdiń barlyq óńirlerine baryp egjeı-tegjeı túgendeý jumysy júrgizildi. Bul jumysty biz ákimdiktermen, memlekettik kirister, tótenshe jaǵdaılar, memlekettik sáýlet-qurylys baqylaýy, sanıtarlyq-epıdemıologııalyq baqylaý ókilderimen birlesip júrgizdik. Óńirlik saparlardyń qorytyndysy boıynsha saýda bazarlaryn jańǵyrtý jónindegi Jol kartasyn ózektendirdik. Osylaısha, ózektendirilgen 2024-2025 jyldarǵa arnalǵan Jol kartasyna sáıkes 115 bazardy jańǵyrtý josparlanǵan», - dedi ol.
Komıtet basshysynyń aıtýnysha, bıyl 16 bazarda jańǵyrtý jumystary aıaqtalýy kerek.
«Onyń ishinde Almatydaǵy «Saýran», «Saryarqa», «Saýda kent», «Tıgrohaýd», «Kenjehan-1» jáne «Kenjehan 2» bazarlary bar. Jyl sońyna deıin Shymkent qalasynda 3 bazar, Almaty oblysynda 1, Jambyl oblysynda 2, Qostanaı jáne Ulytaý oblystarynda 1 bazar, Túrkistan oblysynda 2 saýda bazary jańartylady. Al kelesi 2025 jyly 99 bazardy jańǵyrtý josparlanǵan», - dedi Aıdar Ádilbekov.
