Keles ózeniniń sýy ishýge jaramsyz — ekologter
TÚRKІSTAN. KAZINFORM — Keles ózeniniń sýy mıkrobıologııalyq turǵydan lastanǵan. Bul týraly Túrkistan oblysynyń sanıtarııalyq-epıdemıologııalyq baqylaý departamenti málimdedi.
Saryaǵash aýdandyq sanıtarııalyq-epıdemıologııalyq baqylaý basqarmasynyń mamandary «Saryaǵash turmys» memlekettik kásipornyna jospardan tys tekserý júrgizip, mekemege qarasty káriz júıesinen úsh óreskel zańbuzýshylyq anyqtaǵan.
Anyqtalǵan kemshilikterge baılanysty zańdy tulǵaǵa 160 aılyq eseptik kórsetkish kóleminde ákimshilik aıyppul salyndy jáne nusqama berildi.
Sondaı-aq, Saryaǵash aýdanyna qarasty Kókterek eldi mekenindegi káriz júıesine qatysty máseleler jergilikti atqarýshy organnyń qaraýyna usynys hat arqyly joldandy.
Mekeme tarapynan Keles ózeniniń sýynan mıkrobıologııalyq jáne vırýsologııalyq kórsetkishterge zertteý maqsatynda synama alyp, zertteý úshin Ulttyq saraptama ortalyǵy Túrkistan oblysy boıynsha fılıalynyń Shymkent qalalyq bólimshesine tapsyrylǵan.
Zertteý nátıjesinde laktoza oń ishek taıaqshalarynyń ındeksi sanıtarlyq normadan asyp ketkeni belgili boldy.
Normatıv boıynsha 1 dm³ sýdaǵy shekti kórsetkish 5000-nan aspaýy tıis bolsa, Keles ózenindegi kórsetkish 9100-ge jetken.
— Bul Keles ózeniniń mıkrobıologııalyq turǵyda lastanǵanyn bildiredi. Ózen sýy aýyzsý retinde paıdalanýǵa jaramsyz, degenmen balyqtarǵa zııany joq, — delingen Túrkistan oblysynyń sanıtarııalyq-epıdemıologııalyq baqylaý departamenti aqparatynda.
Ekologııalyq talaptar da saqtalmaǵan
Saryaǵash aýdanynyń Kókterek eldi mekeninde Keles ózenine káriz sýynyń tógilýi boıynsha áleýmettik jelide jarııalanǵan vıdeoǵa baılanysty Túrkistan oblysy boıynsha ekologııa departamenti de «Saryaǵash-Turmysqa» jospardan tys tekserý júrgizdi.
Sarqyndy sý synamasyn alyp, taldaý nátıjesinde Ekologııa kodeksiniń 106 jáne 222-baptarynyń talaptarynyń buzylǵanyn anyqtady.
Osyǵan baılanysty Ákimshilik quqyq buzý týraly kodeksiniń negizinde hattama toltyryldy.
Sarqyndy sýdaǵy lastaýshy zattardyń shoǵyrlanýy mynadaı:
- Nıtrattar — 0,78 mg/dm³
- Nıtrıtter — 0,206 mg/dm³
- Fosfattar — 1,9 mg/dm³
- Sýlfattar — 900,78 mg/dm³
- Hlorıdter — 241,1 mg/dm³
- Anıondy bettik belsendi zattar — 0,36 mg/dm³
- Ammonıı — 22,66 mg/dm³
- Sýtek kórsetkishi (rN) — 7,4
- Qurǵaq qaldyq — 2293,0 mg/dm³
Ekologııa kodeksiniń 216-babynyń 2-tarmaǵyna sáıkes, ruqsat etilgen tógindiler normatıvterine deıin tazartylmaǵan sarqyndy sýlardy sý obektilerine nemese jer bederine tógýge tyıym salynady.
Al 222-baptyń 8-tarmaǵynda tazartylý dárejesine qaramastan, mundaı sýlardy aýyzsý kózderi men sanıtarııalyq qorǵaý aımaqtaryna tógýge jol berilmeıtini naqty jazylǵan.
Mamandar turǵyndarǵa ózen sýyn tutynbaý keregin eske salady. Olardyń aıtýynsha, ózen sýyn aýyz sý retinde nemese turmystyq maqsatta paıdalanbaǵan durys. Sebebi bul adam densaýlyǵyna keri áser etýi múmkin.
Aıta keteıik, budan buryn Saryaǵash sanatorııinen aqqan káriz sýy Keles ózenine quıylǵanyn jazǵan bolatynbyz.