Keler jyly Úkimet qandaı zań jobalaryn ázirleıdi

QR Ádilet mınıstri Azamat Esqaraev Úkimettiń 2024 jylǵa arnalǵan jospar jobasy týraly aıtyp berdi, dep habarlaıdy Kazinform.

Mınıstrdiń aıtýynsha, jospar jobasy memlekettik organdardyń usynystary negizinde ázirlendi jáne 21 qyrkúıekte zań jobalaý qyzmeti jónindegi vedomstvoaralyq komıssııada maquldandy.

«Bastapqyda jospar jobasynda 16 zań jobasyn ázirleý kózdelgen edi. Búgingi kúni josparǵa shamaly ózgerister engizildi. Atap aıtqanda, Parlament depýtattarynyń uqsas Zań jobasyna bastamashylyq jasaǵanyna baılanysty taýarlardyń shyǵarylǵan elin aıqyndaý máseleleri boıynsha zań jobasy jospardan alyp tastaldy. Arhıv isi jáne mádenıet máseleleri boıynsha jáne «Kásibı parasattylyqqa testileý týraly» zań jobalary qosymsha engizildi», - dedi A. Esqaraev Úkimettiń qorytyndy otyrysynda.

Mınıstr aıtqandaı, josparda 18 zań jobasyn ázirleý kózdelgen, onyń ishinde Parlamentke birinshi jartyjyldyqta 3, ekinshi jartyjyldyqta – 15 zań jobasyn engizý josparlanýda.

Atalǵan zań jobalarynyń konsýltatıvtik qujattary vedomstvoaralyq komıssııada maquldanǵan.

Buǵan deıin A. Esqaraev memlekettik organdardyń zań jobalaý jumysyn nashar josparlaǵanyn synǵa alǵan edi.

«2024 jyly 18 zań jobasyn ázirleý qajet bolady. Olardyń ishinde jańa Tsıfrlyq kodeks jobasy, sondaı-aq ınnovatsııalyq qyzmet salasyn memlekettik qoldaý júıesin jetildirý máseleleri boıynsha zań jobasy erekshe mańyzdy. Atalǵan zań jobalarynyń qabyldanýy IT-salany damytýǵa, perspektıvaly startaptar sanyn ulǵaıtýǵa, qosymsha ınvestıtsııalar tartýǵa múmkindik beredi», - dedi Premer-Mınıstr Álıhan Smaıylov.

Bilim jáne ǵylym salasyn damytý, sondaı-aq ýnıversıtetterdi ornyqty qarjylandyrýdy qamtamasyz etý maqsatynda Nysanaly kapıtal qory týraly zań jobasy ázirlenedi.

Quqyq qorǵaý organdarynda sybaılas jemqorlyqtyń aldyn alý maqsatynda jańa Zań jobasy arqyly kásibı ádeptilikti tekserý ınstıtýty engiziledi.