Kedergi emes, kópir salý qajet
TsıÝIFÝ. KAZINFORM – Shandýn provıntsııasyndaǵy Tsıýıfý qalasynda ótken Qytaı Medıa korporatsııasynyń (CMG) IV Ǵalamdyq medıa-ınnovatsııalar forýmyna Qazaqstan Respýblıkasynan Prezıdent Teleradıokesheniniń dırektory Raýshan Qajybaeva men «Habar» agenttigi» AQ basqarma tóraǵasy Kemelbek Oıshybaev qatysty.
Forýmnyń basty sessııasynda zamanaýı tehnologııalardyń áserinen jahandyq medıa-ekojúıeniń túrlenýi men BAQ-tyń órkenıetaralyq dıalogke yqpaly talqylanyp, onda Raýshan Qajybaeva sóz sóıledi. Ol «qazirgi zamanǵy tehnologııalardyń keıde keri baǵytta, atap aıtqanda jaǵymsyz kontentti jasaý men taratý úshin paıdalanylatynyn» aıta kelip:
- Qazaqstandyq jáne qytaılyq BAQ dástúrli túrde shynaıy, salmaqty ári shyndyqqa negizdelgen aqparattarymen erekshelenedi. Bul bizge kedergi emes, kópir salýǵa múmkindik beredi, – dedi.
Sondaı-aq ol bylaı dep oı bólisti:
- Qazaqstan men Qytaıdyń medıadaǵy áriptestigi berik, aradaǵy mádenı dıalogti damytý baǵytymen erekshelenedi. Buǵan halyqtardyń ózara túsinistigi jáne bir-birine degen qurmeti arqyly qol jetkizip otyrmyz.
Teleradıokeshen dırektory óz sózinde Memleket basshysynyń qazaq-qytaı qarym-qatynasy týraly pikirin eske saldy:
- Keshe elimizdiń Prezıdenti Qasym-Jomart Toqaev: «Qytaı halqy qazaq halqyna eshqashan zııan tıgizgen emes jáne bolashaqta da tıgizbeıdi». Bul sózge alyp-qosarymyz joq. Biz bul oıdy aqparattyq saladaǵy kúndelikti jumysymyzda berik ustanýǵa daıynbyz.
IV Ǵalamdyq medıa forým barysynda Euronews dırektorlar keńesiniń tóraǵasy Pedro Vargas Davıd, CNBC International prezıdenti Dıp Bagchı, Associated Press-tegi Global Media Services vıtse-prezıdenti jáne atqarýshy dırektory Endrıý Breddel, Reuters agenttiginiń prezıdenti Pol Baskobert jáne basqalary sóz sóıledi.
Plenarlyq sessııa aıasynda «Panda planetasy» jobasy men «Qytaı kózge kórinbeıtin murasy arqyly» atty jahandyq týrdyń bastalǵany jarııalandy.
Sonymen qatar forým sheńberinde Prezıdent Teleradıokesheniniń dırektory Raýshan Qajybaeva men Qytaı Medıa korporatsııasynyń (CMG) prezıdenti ári bas redaktory Shen Haısıýn arasyndaǵy ekijaqty kezdesý ótti.
Aıta keteıik, 2024 jyldyń shilde aıynda Qazaqstan men Qytaı kóshbasshylarynyń qatysýymen Prezıdent Teleradıokesheni men CMG yntymaqtastyq jáne ózara túsinistik týraly memorandýmǵa qol qoıǵan bolatyn. Qujat aqparattyq kontentpen, telebaǵdarlamalarmen almasýǵa, sondaı-aq materıaldardy taratý jáne tájirıbe almasý máselelerinde ózara qoldaýǵa baǵyttalǵan.
QR Prezıdentiniń Teleradıokesheni – tolyq tsıkldi qazaqstandyq medıakompanııa. Onyń quramyna respýblıkalyq «Jibek Joly» telearnasy, halyqaralyq «Silk Way» jáne «Silk Way Cinema» arnalarymen qatar, «Kazinform» halyqaralyq aqparat agenttigi jáne Derekti kıno ortalyǵy kiredi.
Qytaı Medıa korporatsııasy (CMG) – álemdegi eń iri medıakonglomerattardyń biri. Onyń quramynda Qytaıdyń Ortalyq telearnasy (CCTV), Qytaı halyqaralyq telearna jelisi (CGTN), Qytaı ulttyq radıosy (CNR) jáne Qytaı halyqaralyq radıosy (CRI) bar. Jalpy alǵanda, korporatsııa 47 telearna, 17 radıostantsııa jáne 17 gazetti biriktiredi.