Keden jáne salyq jeńildikteri: kimge jáne qandaı jaǵdaıda beriledi
ASTANA. KAZINFORM — Qazaqstanda kedendik tólemder men salyqtardy tóleý kezindegi jeńildikterdi berý tártibi Eýrazııalyq ekonomıkalyq odaqtyń (EAEO) normalarymen, halyqaralyq sharttarmen jáne ulttyq zańnamamen retteledi, dep habarlaıdy Memlekettik kirister komıteti.
Vedomstvo atap ótkendeı, bul — bıznesti memlekettik qoldaýdyń jáne syrtqy ekonomıkalyq qyzmetti yntalandyrýdyń mańyzdy tetigi.
— Kedendik-tarıftik jeńildikterge qatysty barlyq másele EAEO deńgeıinde tolyq rettelmegen. Sondyqtan Odaqqa múshe memleketter qosymsha qoldaý sharalaryn derbes belgileýge quqyly. Qazaqstanda bul tártip Keden kodeksi men Qazaqstan Respýblıkasynyń Salyq kodeksinde aıqyndalǵan. Jeńildikter syrtqy ekonomıkalyq qyzmetke qatysýshylardyń qarjylyq júktemesin azaıtýǵa, ınvestıtsııalyq tartymdylyqty arttyrýǵa jáne otandyq kásiporyndardyń básekege qabilettiligin kúsheıtýge múmkindik beredi, — dep túsindirdi komıtettegiler.
Kedendik bajdardy tóleýden bosatý EAEO týraly shartqa qosymsha № 6 hattama men Keden odaǵy komıssııasynyń 2009 jylǵy № 130 sheshimine sáıkes júzege asyrylady.
Kedendik bajdar tóleýden kelesi taýarlar bosatylady:
• gýmanıtarlyq nemese tehnıkalyq kómek retinde ákelinetin;
• sheteldik quryltaıshynyń jarǵylyq kapıtalǵa qosqan úlesi retinde ákelinetin;
• EAEO kemeleriniń teńiz aýlaý ónimderi;
• valıýta men baǵaly qaǵazdar;
• tabıǵı apattardyń zardaptaryn joıýǵa arnalǵan taýarlar.
Vedomstvo bul jeńildikter jalpy sıpatqa ıe jáne taýardyń shyqqan eline táýeldi emes ekenin naqtylady. Olardy qoldaný tártibi Keden odaǵy komıssııasynyń 2011 jylǵy 15 shildedegi № 728 sheshimimen bekitilgen.
QR Salyq kodeksiniń 399-babyna sáıkes, qosylǵan qun salyǵyn tóleýden kelesi taýarlar bosatylady:
• gýmanıtarlyq jáne qaıyrymdylyq maqsattarda ákelinetin;
• óndiristik qajettilikterge arnalǵan, sonyń ishinde jabdyqtar, shıkizat jáne materıaldar.
Atalǵan jeńildikterdi qoldaný tetigi QR Qarjy mınıstriniń 2018 jylǵy 23 aqpandaǵy № 267 buıryǵymen bekitilgen.
— «Kedendik retteý týraly» QR Kodeksiniń 80-babyna sáıkes, keıbir jaǵdaıda taýarlardy deklaratsııalaý úshin alynatyn kedendik alymdar tólenbeıdi. Mundaı jaǵdaılar halyqaralyq sharttarmen jáne ulttyq aktilermen aıqyndalady. Osylaısha, zańda kózdelgen kedendik tólemder men salyqtar boıynsha jeńildikter — bul óndiristik damýdy yntalandyrýdyń, ınvestıtsııa tartýdyń jáne qazaqstandyq kompanııalardyń halyqaralyq naryqtaǵy pozıtsııasyn nyǵaıtýdyń tıimdi tetigi. Jeńildikter bıznesti júrgizýge qolaıly jaǵdaı jasap, eldegi ekonomıkalyq belsendiliktiń ósýine yqpal etedi, — delingen habarlamada.
Budan buryn Memlekettik kirister komıteti tóraǵasynyń orynbasary Jánibek Nurjanov QQS-tan bosatylatyn nysandarǵa qatysty túsinik berdi.