QDB men QKM tikeleı ınvestıtsııalar qoryn qurdy
Qordyń 97 paıyzy negizgi ınvestory ári seriktesi Qazaqstan damý bankine tıesili. Al 3 paıyzy qordyń taǵy bir seriktesi ári basqarýshysy Qazyna kapıtal menedjmenttiń úlesinde. Bastapqy kapıtaly 33,5 mlrd teńge.
«Eki damý ınstıtýttynyń arasyndaǵy sınergııa jobany alǵash tapqannan bastaý alyp, keshendi saraptaý men korporatıvtik sheshimder qabyldaý kezinde de jalǵasyn tabady. Qazaqstan damý banki men Qazyna kapıtal menedjmenttiń osy qor aıasyndaǵy seriktestigi qosymsha qaryz alýǵa múmkindigi joq áleýetti jobalarǵa private equity quraldaryn qoldaný arqyly damýǵa múmkindik beredi», - dedi «Báıterek» UBH» AQ Basqarma tóraǵasy mindetin atqarýshy Aıdar Áriphanov.
«Qazaqstan damý banki» AQ-nyń basqarma tóraǵasy Bolat Jámishev óz kezeginde qordy bastapqy kapıtaldandyrý 33,5 mlrd teńgege deıin jetetindigin aıtty.
«Qosymsha qarjylandyrý tıisti jobalardyń paıda bolýyna baılanysty. Qordy kásibı basqarý úshin Qazyna kapıtal menedjmentti jumyldyryp otyrmyz. Sonda kompanııanyń kapıtalǵa kásibı qatysýy men korporatıvtik basqarý júıesin damytýǵa qatysty barlyq máseleleri sheshimin tabady» - dedi ol.
Al «Qazyna kapıtal menedjment» AQ-nyń Basqarma tóraǵasy Asqar Dostııarov bul qor kompanııanyń qyzmetin baqylaý úshin qurylmaǵandyǵyn atap ótti.
«Qor ınvestıtsııa ǵana usynbaıdy, QKM-tiń basqa jobalarynyń mysalynda bıznes protsesterdi, korporatıvtik basqarýdy arttyrýdy, sondaı-aq, kompanııanyń operatsıondyq jáne qarjylyq kórsetkishterin jetildirý tásilderin kórsetip, óziniń tájirbıesimen bólisedi. Bul bıznestiń qundylyǵyn kóterip, halyqaralyq ınvestorlar úshin kompanııanyń tartymdylyǵyn arttyrý úshin qajet», - dedi Asqar Dostııarov.
