QazUÝ nanospýtnıgi ǵaryshqa sátti jiberildi
Nanospýtnık 4 jeltoqsanda Astana ýaqyty boıynsha 00:32-de Kalıfornııa (AQSh) shtaty ǵarysh alańyndaǵy Vandenberg áskerı-áýe bazasynda «Falcon 9» zymyran tasymaldaýshysymen ushyryldy. Nanospýtnık shtattyq kestede jumys isteıdi.
«Al-Farabi-2» nanospýtnıgi úzdik ınnovatsııalyq tehnologııalardy, qazaqstandyq patentpen qorǵalǵan apparattyń negizgi komponentterin jáne toraptaryn ózine biriktiredi. Ol ǵylymı túpnusqalardy, tehnologııalyq jáne bilim berý tapsyrmalaryn sheshýge arnalǵan, sonymen birge QazUÝ ǵalymdary jasaǵan shaǵyn ǵaryshtyq apparatqa arnalǵan bortty kompıýterdiń elektrondy komponentterin tájirıbeden ótkizýge múmkindik beredi. Ǵylymı-zertteý jumystardyń jáne eksperımentterdiń nátıjeleri Qazaqstan áýe-ǵarysh salasyna jáne ýnıversıtettiń sheteldik seriktesterine qundy jáne ózekti bolmaq.
«Qazaqstan Respýblıkasynyń Táýelsizdik kúni qarsańynda qazaqstandyq nanospýtnıktiń ashyq ǵaryshta iske qosylýy - qazaqstandyq ǵylym men spýtnık qurastyrý tarıhynda taǵy bir mańyzdy kezendi aıǵaqtaıdy. QazUÝ nanospýtnıgi osymen ekinshi ret ǵaryshqa engizildi. Birinshi «Al-Farabi-1» ǵaryshqa 2017 jyldyń 15 aqpanynda Úndistandaǵy Satısh Dhavan atyndaǵy ǵarysh alańynan jiberilgen bolatyn. Ol túrik áleminiń kórnekti oqymystysy, bizdiń ýnıversıtetke esimi berilgen ál-Farabıdiń qurmetine atalǵan bolatyn», - dep atady joba jetekshisi akademık Ǵalym Mutanov.
Ǵaryshtyq tehnologııalar salasynda ulttyq ǵylymı mektep qurý, jobalaý, qurastyrý jáne nanospýtnıkterdi ushyrý boıynsha keń kólemdi joba, osy salada joǵary bilikti mamandardy daıarlaý QazUÝ-da halyqaralyq «UNIFORM» konsortsıýmy aıasynda 2013 jyldan beri júzege asyrylyp keledi.
Ál-Farabı atyndaǵy QazUÝ Qazaqstandy «tsıfrly dáýirge» engizý boıynsha «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Qazaqstan halqyna arnalǵan Joldaýda aıtylǵan Elbasy tapsyrmalaryn oryndaýda maqsatty túrde jumystar júrgizýde. Ǵylymdy qajet etetin jańa tehnologııalardy jáne tehnıkalyq, sonyń ishinde ǵaryshtyq salada quraldardy qurý ýnıversıtet qyzmetindegi basym baǵyttar bolyp tabylady.
