QazUÝ men Oksford ýnıversıteti arasyndaǵy yntymaqtastyq nyǵaıa tústi
QazUÝ rektory Ǵalym Mutanovtyń Oksford ýnıversıtetine jumys sapary barysynda osyndaı kelisimge keldi. Ǵalymdar, oqytýshylar jáne ákimshilik ókilderimen kezdesý barysynda taraptar eki jaqty yntymaqtastyqty odan ári tereńdetýge qyzyǵýshylyq tanytyp, bilim berý isindegi seriktestiktiń basym baǵyttaryn jáne birlesken ǵylymı zertteýlerdi júzege asyrýdy talqylady. Joǵary bilikti mamandardy daıarlaý maqsatynda QazUÝ-dyń eń úzdik magıstranttary men doktoranttary «Ǵylymǵa kirispe» birlesken bilim berý baǵdarlamasy aıasynda Oksfordqa oqýǵa jiberilmek.
Sonymen qatar, aǵylshyndyq áriptester ózderiniń zerthanalarynda QazUÝ professorlarymen geografııa, tarıh, ıadrolyq fızıka jáne t.b. salalardaǵy jobalarmen birlese ǵylymı-zertteý jumystaryn júrgizedi. Eki joǵary oqý orny arasyndaǵy yntymaqtastyq tájirıbesi qazirdiń ózinde qoljetimdi.
Osy jyldyń sáýir aıynda QazUÝ Oksford ýnıversıtetimen birlese Eýrazııanyń ortalyq bóliginde ornalasqan arıdti aımaqtarynyń turaqty damýynyń ózekti máselelerine arnalǵan «Arıdti aımaqtar: ekologııalyq jáne áleýmettik turaqtylyq» atty halyqaralyq ǵylymı konferentsııa ótkizdi. Ǵylymı jáne tájirıbelik qundylyqtaryn erekshe atap ótken sheteldik ǵalymdar men sarapshylar sharaǵa joǵary baǵa berdi.
Oksford ýnıversıteti - álemdegi eń kóne jáne úzdik ýnıversıtetterdiń biri. Onda 20 myńnan astam stýdent bilim alady, onyń tórtten bir bóligi - sheteldik stýdentter. QS halyqaralyq reıtıngisinde ol álemdegi úzdik bes ýnıversıtettiń qataryna engen.