QazUÝ maqsaty - álemniń jetekshi oqý orny ataný

ALMATY. QazAqparat - Ál-Farabı atyndaǵy QazUÝ álemniń jetekshi JOO-larynyń qataryna enýdi kózdep otyr. «Mundaı ýnıversıtetter óz eliniń, sondaı-aq búkil aımaqtardyń damýyn aıqyndap, jetekshi ekonomıkalardyń negizgi salalary men  baǵyttaryn mamandarmen qamtamasyz etedi» dep atap ótti ýnıversıtet rektory Ǵalym Mutanov halyq aldyndaǵy eseptik kezdesýde.

Rektor ýnıversıtet qyzmetiniń baǵyttary, qol jetkizgen jetistikteri jáne myńdaǵan ǵalymdar ujymy, oqytýshylar men stýdentterdiń aldynda turǵan strategııalyq mindettter týraly egjeı-tegjeıli baıandady. QazUÝ-nyń álemdik deńgeıdegi zertteý ýnıversıtetine transformatsııalaný baǵytymen maqsatty túrde kele jatqany atalyp ótti. Bıyl ýnıversıtet QS halyqaralyq reıtınginde taǵy da alǵa jyljyp, álemniń eń úzdik joǵary oqý oryndary arasynda 220-orynǵa ıe boldy. Bul topqa TMD elderinen  QazUÝ men Lomonosov atyndaǵy MMÝ ǵana kirip otyr.

«QazUÝ óziniń halyqaralyq básekege qabilettiligin kóterý jáne álemniń 200 úzdik top ýnıversıteti quramyna ený jónindegi el Prezıdentiniń tapsyrmasyn oryndaý jolynda belsendi jumystar atqarýda. Ýnıversıtet oqý baǵdarlamalarynyń 90%-y halyqaralyq agenttikterdiń akkredıtatsııasynan sátti ótti. Birneshe oqý baǵdarlamasy «EUR-ACE® Label» eýropalyq sapa belgisin ıelengen. QazUÝ - qos dıplom boıynsha sheteldik jetekshi joǵary oqý oryndarymen 70-ten asa baǵdarlamany júzege asyryp otyrǵan jalǵyz ýnıversıtet», - dedi QazUÝ basshysy baıandamada.

Ekonomıkany jańǵyrtý jáne óndiriske mamandardy daıarlaýǵa baǵyttalǵan 4.0 memlekettik damý baǵdarlamasy aıasynda osy oqý jylynda QazUÝ-da qaǵıda turǵysynda «E-kommertsııa», «Tsıfrlyq lıngvıstıka», «BIG DATA», «Jasandy ıntellekt», «Geoınformatıka», «Internet buıym», «Bıoınformatıka» jáne t.b. jańa bilim berý baǵdarlamalary engizildi. Sondaı-aq, AHQO jáne Benhalıf Ýnıversıtetimen (Katar) birlese ıslam qarjysy jáne bankıng boıynsha baǵdarlamalar engizilýde. Aǵylshyn tilinde 162 mamandyq oqytylady.

Ýnıversıtet aldyńǵy qatarly tájirıbeler ortalyǵyna, ınnovatsııa men naqty óndiristiń, ǵylym men bilimniń ortaq transfertine aınalýda. Joǵary tehnologııalyq iri korporatsııalar ýnıversıtettiń zertteý jáne bilim berý jumystaryna belsene aralasady. QazUÝ-da «Hewlett-Packard», «Cisco», «Konisa Minolta», «Fujitsu», «Samsung», «Alcatel», «Microsoft», «Kasperskıı zerthanasy», «Huawei», «SAP» jáne t.b. álemdik kompanııalardyń 16 ǵylymı-bilim berý ortalyǵy qurylǵan ári búginde tabysty jumys atqaryp jatyr.

Halyqpen esepti kezdesý barysynda Ǵalym Mutanov Almaty qalasynyń turǵyndary men BAQ ókilderiniń, oqytýshylar, stýdentter jáne olardyń ata-analarynyń suraqtaryna jaýap berdi. Olardyń  tilek-usynystary eskerilip, tıisti qyzmetterge nusqaý berildi.