QazUÝ-dyń 2025 jylǵa deıingi damý strategııasy anyqtaldy
Qazaqstan Respýblıkasy Úkimetiniń qaýlysyna sáıkes memlekettiń júz paıyz qatysýymen kommertsııalyq emes aktsıonerlik qoǵam mártebesine ıe bolǵan elimizdiń jetekshi ýnıversıtetiniń ujymy óz aldyna álemniń úzdik 100 joǵary oqý ornynyń qataryna kirý maqsatyn alǵa qoıýda.
Baǵdarlamanyń basym baǵyty ǵylym, bilim jáne ınnovatsııalardy ıntegratsııalaý negizinde JOO-nyń jahandyq básekege qabilettiligin arttyrý. Ýnıversıtettiń 4.0 zamanaýı modeli aıasynda QazUÝ bilim berý qyzmetterin eksporttaıtyn álemdik deńgeıdegi zertteý ýnıversıtetine júıeli túrde aýysýda. Baǵdarlamaǵa sáıkes ulttyq jáne halyqaralyq deńgeıde ǵylymı, bilim berý jáne ınvestıtsııalyq serpindi jobalar iske asyrylatyn bolady. QazUÝ, sondaı-aq, «Al-Farabi Smart University» keshendi jobasy negizinde ozyq tsıfrlyq ekojúıe qalyptastyrýǵa nıetti, zertteý jáne ınnovatsııalyq komponentter boıynsha álemniń úzdik ýnıversıtetteriniń pozıtsııalaryna qol jetkizý josparlanýda.
Sonymen birge baǵdarlamada álemniń jetekshi joǵary oqý oryndarynda ál-Farabı ortalyqtarynyń sanyn ulǵaıtý jáne QazUÝ-dyń sheteldik fılıaldaryn ashý kózdelgen, bul ýnıversıtettiń álemdik ǵylymı-bilim berý keńistigine ıntegratsııalanýyna jáne bilim berý qyzmetteriniń jetekshi eksporttaýshysy retinde halyqaralyq tanymaldyǵyn arttyrýǵa yqpal etetin bolady. Bul rette bilim alýshy stýdentterdiń keminde tórtten bir bóligin shetel azamattary quraıdy dep boljanýda. Bes jyl ishinde shoǵyrlandyrylǵan bıýdjet kólemi 1,5 ese, oqytýshylardyń jalaqysy 2 ese ósedi.
Álemdik deńgeıdegi ýnıversıtet kampýsyn qurý, ınnovatsııalyq ınfraqurylymdy damytýǵa ınvestıtsııalar tartý jónindegi sharalar kesheni baǵdarlamanyń mańyzdy bóligi. QazUÝ qalashyǵyn damytýdyń úshinshi kezegin iske asyrý sheńberinde joǵary oqý ornynyń barlyq ǵımarattary men qurylystarynyń jalpy alańyn ulǵaıtý kózdelýde. 1250 oryndyq jaılylyǵy joǵary jańa jataqhana, áleýmettik jáne oqý-óndiristik maqsattaǵy ǵımarattar paıdalanýǵa beriledi.
Bilim berýdi, ǵylym men óndiristi ıntegratsııalaý jáne ǵylymı ázirlemelerdiń nátıjelerin ekonomıkanyń naqty sektoryna engizý jónindegi mańyzdy mindet tur. Osy rette ál-Farabı ǵylymı-tehnologııalyq alqabyn qurý jónindegi aýqymdy joba iske asyrylatyn bolady, oǵan ınnovatsııalyq, medıtsınalyq-bıologııalyq jáne halyqaralyq IT klasterler kiredi.
Ýnıversıtettiń joǵary tehnologııalyq quramdas bóligin damytýmen qatar baǵdarlama joǵary bilikti básekege qabiletti mamandardy el patrıottary jáne álem azamattary retinde qalyptastyrýǵa baǵyttalǵan rýhanı-adamgershilik tuǵyrnamasyn kúsheıtýdi kózdeıdi. Damýdyń jańa kezeńinde qoǵamdy áleýmettik-rýhanı jańǵyrtý jáne ulttyń jańa sapasyn qalyptastyrý draıveri retindegi ýnıversıtettiń rólin nyǵaıtý QazUÝ-dyń mańyzdy sıpattamasyna aınalady. QazUÝ Nıý-Iorktegi BUU shtab-páterinde usynǵan jańa býyn JOO-nyń damý modeli Ýnıversıtet 4.0 halyqaralyq deńgeıde iske asyrylatyn bolady.
QazUÝ elimizdiń aldyńǵy qatarly joǵary oqý orny retinde Qazaqstannyń ártaraptandyrylǵan ekonomıkasynyń jetekshi draıverine aınalýy tıis, osy turǵydan, damýdyń jańa baǵdarlamasy alǵa qoıylǵan strategııalyq maqsattarǵa qol jetkizýge, sapaly ósý men jahandyq ǵylymı-bilim berý qoǵamdastyǵynda básekege qabilettilikti arttyrýǵa múmkindik beredi.
