QazUÝ-de Elbasy Joldaýyndaǵy negizgi basymdyqtar talqylandy
Prezıdenttiń jańa bastamalary elimizdiń jetekshi ýnıversıtetiniń oqytýshylary men stýdentteri tarapynan qyzý qoldaý tapty. Ǵalymdar negizinen kásiptik daıarlaý salasyna qoıylǵan mindetterdi talqylady.
Kezdesýdi ashqan ál-Farabı atyndaǵy QazUÝ rektory Memleket basshysy adamı kapıtaldyń sapaly ósýine jaǵdaı jasaýǵa erekshe nazar aýdarǵanyn atap ótti. Bilim berý, ǵylym jáne densaýlyq saqtaý salasyna jumsalatyn shyǵyndardy JІÓ-niń 10 paıyzǵa deıin jetkizý elimizdiń áleýmettik damýyn anyqtaıtyn negizgi baǵyttarǵa qýatty serpin bermek.
Qazaqstandyq joǵary oqý oryndarynda oqytý sapasyna qoıylatyn talaptar artýda. Osyǵan baılanysty ál-Farabı atyndaǵy QazUÝ bilim berýdiń jańa sapasyn qamtamasyz etýge arnalǵan «Ýnıversıtet 4.0» jańa býyn úlgisin iske asyrýda ekendigin atap ótý qajet.
Ekonomıkany jańǵyrtýǵa jáne 4.0 ónerkásibine arnalǵan kadrlardy daıarlaýǵa baǵyttalǵan memlekettik damý baǵdarlamalary aıasynda QazUÝ osy oqý jylynan bastap túpkilikti jańa bilim berý baǵdarlamalaryn usynýda, olar: elektrondyq kommertsııa, sandyq lıngvıstıka, Big data, jasandy ıntellekt, geoınformatıka, zattar ınterneti, bıoınformatıka jáne t.b. AHQO jáne Hamad bın Halıfa ýnıversıtetimen (Katar) birlese ıslamdyq qarjylandyrý salasy boıynsha magıstrlik baǵdarlama iske qosyldy. «Sandyq Qazaqstan» baǵdarlamasyn iske asyrý sheńberinde QazUÝ alǵash ret TMD keńistiginde sandyq ýnıversıtet úlgisin quryp, ýnıversıtet jumysyn avtomattandyrýǵa arnalǵan bultty tehnologııalar, kampýstyq ınfraqurylymdy basqarýdaǵy aqyldy tehnologııalar, analıtıkalyq júıeni qurý úshin Big Data tehnologııasyn engizdi. QazUÝ bastamasymen qurylǵan Qazaqstannyń ulttyq ashyq bilim berý platformasy qazaqstandyq joǵary oqý oryndarynyń básekege qabilettiligin arttyra túsýde. Ál-Farabı atyndaǵy QazUÝ Qazaqstan men TMD-da alǵash bolyp jahandyq ǵylymı jáne bilim berý keńistiginde básekege qabiletti kúshti ǵylymı toptardy qurýǵa múmkindik beretin postdoktorantýra baǵdarlamasyn ashty.
Memleket basshysynyń ıdeıasyn júzege asyrý maqsatynda ýnıversıtette halyqaralyq IT-tehnopark qurý boıynsha jumystar júrgizilýde, onyń negizin QHR-diń memlekettik granty - joǵary deńgeıdegi sýperkompıýter quraıtyn bolady. Bul jobanyń júzege asyrylýyn Jańa Jibek joly ýnıversıtetteri Alıansynyń músheleri bolyp tabylatyn álemniń 130-dan astam joǵary oqý orny qoldady.
Ýnıversıtet Ǵylymı Keńesiniń talqylaýy nátıjesinde Joldaýdy júzege asyrýdyń keshendi jol kartasy qabyldandy. Ol prezıdenttik tapsyrmalardyń oryndalýyn, sonyń ishinde stýdenttik qalashyqta barynsha jaıly orta qurýdy, reıtıngtik eńbekaqy júıesin jetildirýdi, ımport almastyratyn joǵary tehnologııalyq ónimderdi shyǵarýdy jáne joǵary tehnologııalyq qyzmetterdi usynýdy, oqýshylardyń kásibı dıagnostıkasyn júrgizýdi jáne taǵy basqalardy qamtamasyz etetin bolady.
