QazUÝ-da jerústi spýtnıktik stantsııasy salynady
ALMATY. KAZINFORM – Ál-Farabı atyndaǵy QazUÝ bazasynda Haınan spýtnıktik derekter ortalyǵy jáne Qytaıdyń Soltústik-batys polıtehnıkalyq ýnıversıtetimen birlesken jerústi spýtnıktik stantsııasy salynady. Bul týraly Ǵylym jáne joǵary bilim mınıstrligi málim etti.
Haınan provıntsııasynyń Qytaı halyq saıası keńesiniń komıteti (QHSKK) delegatsııasymen ótken kezdesýde spýtnıktik jerústi stantsııasyn ornatý jáne onyń ornyn tańdaý týraly hattama-kelisimge qol qoıyldy.
— Ótken jyly ál-Farabı atyndaǵy Qazaq ulttyq ýnıversıteti men Qytaı Halyq Respýblıkasynyń Soltústik-batys polıtehnıkalyq ýnıversıteti mıkrospýtnık arqyly ǵylymı zertteýler júrgizý boıynsha kelisimge qol qoıdy. Atalǵan kelisimge Memleket basshysy Qasym-Jomart Toqaev pen Qazaqstanǵa resmı saparmen kelgen QHR Tóraǵasy Sı Tszınpınniń birlesken málimdemesinde qol jetkizilgen bolatyn. Qazirgi ýaqytta bizdiń ǵalymdar SBPÝ-daǵy áriptestermen birlesip kelesi býyndaǵy — Qazaqstan men Ortalyq Azııadaǵy alǵashqy ýnıversıtettik mıkrospýtnık bolyp tabylatyn NKSAT jobasyn ázirleýde, — dedi QazUÝ-dyń Basqarma múshesi — ǵylymı-ınnovatsııalyq qyzmet jónindegi prorektor Marǵulan Ibraımov.
Jalpy quny 3 mıllıon AQSh dollaryn quraıtyn joba aıasynda QazUÝ aýmaǵynda Haınan spýtnıktik derekter ortalyǵy jáne SBPÝ-men birlesip jerústi stantsııasyn ornatý josparlanýda. Bul stantsııa H-dıapazonda jumys istep, bizdiń spýtnıktermen qatar, basqa elderdiń spýtnıkterinen de sıgnal qabyldap, óńdeýge múmkindik beredi.
Óz kezeginde Haınan provıntsııasy QHSKK tóraǵasynyń orynbasary Lı Golıan ýnıversıtetke jemisti yntymaqtastyq úshin alǵys bildirip, Haınan spýtnıktik derekter ortalyǵynyń jerústi stantsııasyn qurý taraptar arasyndaǵy seriktestiktiń jańa kezeńin ashatynyn atap ótti.
Ózara kelisim negizinde QazUÝ-daǵy Soltústik-batys polıtehnıkalyq ýnıversıtetiniń fılıaly bazasynda jerústi qabyldaý stantsııasyn ornatý boıynsha birlesken jumystar atqarylady. Joba Qazaqstan men shekaralas aýmaqtarda spýtnıktik derekterdi taratý, almasý jáne tıimdi paıdalaný múmkindigin arttyrýǵa baǵyttalǵan.
Eske sala keteıik, buǵan deıin órt qaýipsizdigine spýtnıkten monıtorıng júrgizetin júıe jetildiriletinin jazǵan edik.