QazUÝ-da Islam qarjy ortalyǵy ashyldy
Joba ál-Farabı atyndaǵy QazUÝ-dyń Astana halyqaralyq qarjy ortalyǵy (AHQO) jáne Katardaǵy Hamad Bın Halıf ýnıversıtetimen áriptestigi negizinde júzege asty.
Ashylý saltanatynda QazUÝ rektory Ǵalymqaıyr Mutanov, Hamad Bın Halıf ýnıversıtetiniń prezıdenti doktor Ahmad Hasna, AHQO tóraǵasynyń orynbasary Ernur Rysmaǵambetov, qarjy ınstıtýttarynyń ókilderi, oqytýshylar jáne stýdentter qatysty.
Eń jańa tehnıkamen jáne zamanaýı baǵdarlamalarmen qamtylǵan biregeı ortalyq bırjalyq treıdıng daǵdylaryn, irgeli jáne tehnıkalyq taldaý negizderin, qarjylyq ınjenerııany oqytýmen aınalysady. Sondaı-aq aqsha qarajatyn qalaǵan naryqtyq segmentke tájirıbe júzinde ınvestıtsııalaý jáne iri bırjalarmen yntymaqtastyq ornatý múmkindikteri beriledi. Ortalyq ıslam qarjysy boıynsha ǵylymı-bilim berý klasterine aınalady.
Іs-shara barysynda «Qazaqstanda ıslamdyq qarjylandyrý múmkindikterin ashamyz» taqyrybynda dóńgelek ústel uıymdastyryldy. Sóz alǵan QazUÝ rektory joǵary bilikti kadrlardy daıarlaý ınnovatsııalyq ekonomıkanyń ósýiniń negizgi faktorlarynyń biri ekendigin atady jáne Astana ekonomıkalyq forýmy aıasynda resmı bekitiletin úshjaqty áriptestik sátti jáne jemisti yntymaqtastyqtyń irgetasyn qalaıtyndyǵyn jetkizdi.
«Qazaqstannyń jetekshi bilim ordasymen áriptestik ornatý biz úshin úlken qurmet. Ortalyqtyń ashylýynyń Ramazan aıymen tuspa-tus kelýi tereń mánge ıe dep qabyldaımyn. QazUÝ - ıslamdyq qarjylandyrýdy alǵa jyljytýdaǵy bizdiń úzdik seriktesimiz. Bizdiń ortaq maqsat - sáttilik pen órkendeýge negiz bolatyn qarym-qatynasty damytý. Alǵashqy túlekterimizdi quttyqtaıtyn sátti asyǵa kútemin», - dedi doktor Ahmad Hasna óziniń alǵy sózinde.
Ernur Rysmaǵambetovtiń sózinshe, AHQO bolashaq mamandardy daıyndap jatyr jáne damýdyń negizgi sheshýshi faktory adamı kapıtal bolatyn osy jerde qarjy ortalyqtarynyń álemdik ozyq tájirıbeleri aýadaı qajet. Sonymen birge ol ıslamdyq qarjylandyrý boıynsha joǵary bilikti mamandardy daıyndaýda QazUÝ róliniń zor ekendigin atap ótti.
Bilim ordasy ıslam qarjysy boıynsha ulttyq deńgeıde de, halyqaralyq aýqymda da bilimdi mýltıplıkatsııalaýdy maqsat etip otyr.
Ýnıversıtet bazasynda teorııalyq jáne tájirıbelik turǵydan ıslamdyq qarjylandyrý boıynsha saýattylyqty arttyrý ıslamdyq bank sektoryn jandandyrýǵa, sonymen qatar ıslam qundy qaǵazdary bırjalyq treıdıngi sýbektileriniń sanyn artyrýǵa yqpal etedi.
Bıznesti uzaq merzimdi nesıelermen qamtamasyz etý, qor naryǵyn damytý jáne sheteldik ınvestorlardy tartý, azamattardyń qarjylyq saýattyly úshin sharalardy jetildirý Qazaqstannyń qarjy sektoryn odan ári serpindi damytýdyń negizgi baǵyttary bolyp tabylady. Osy kezde ıslam qarjysynyń ınvestıtsııalyq resýrstary senimdi jáne perspektıvaly qural bola alady.
