QazUAÝ Nıderlandy ýnıversıtetimen birigip, maman daıarlaıtyn boldy
Kezdesýde ýnıversıtet rektory, QR UǴA akademıgi Tilektes Espolov qonaqtarǵa oqý ornynyń búgingi jetistikteri men aldaǵy maqsattary týraly baıandady.
«Búgingi tańda QR Úkimetiniń tapsyrmasymen oqý orny álemdik sanattaǵy bilim ordasyna aınalyp jatyr. Jańa formattaǵy mamandardy endi QazUAÝ Nıderlandynyń Vagenıngen ýnıversıtetimen birge daıyndaıtyn bolady. Bul ýnıversıtet - álemdegi agrarlyq mamandyqtar boıynsha QS sanatyndaǵy mamandardy daıyndaıtyn nómiri birinshi JOO. Bıyl oqý ornynyń bazasynda 2 ınnovatsııalyq ortalyq pen zerthana ashýǵa memlekettik bıýdjetten 1,9 mlrd teńge qarajat bólinedi. «Agroýnıversıtet» oqý tájirıbe sharýashylyǵynda Agrotehnıkalyq park ashylady. Sonymen qatar, Esik dendrologııalyq parki bazasynda Sıvers alma aǵashy Ulttyq ortalyǵyn qurý josparda bar», - dedi Tilektes Espolov.
Rektor óz sózinde Parlament depýtattary ýnıversıtettiń ár bastamasyna, ǵalymdardyń ǵylymı jobalaryna únemi qoldaý kórsetip kele jatqanyn aıtty.
QR Parlamenti Májilisiniń depýtaty, Májilistegi Halyqaralyq ister, qorǵanys jáne qaýipsizdik komıtetiniń múshesi, «Nur Otan» partııasy fraktsııasynyń múshesi Zaǵıpa Balıeva, Parlament Májilisiniń depýtaty, Májilistegi Agrarlyq máseleler komıtetiniń múshesi Amangeldi Dáýrenbaev, Parlament Májilisiniń depýtaty, «Nur Otan» partııasy fraktsııasynyń múshesi, Májilistegi Ekonomıkalyq reforma jáne óńirlik damý komıtetiniń múshesi, «Bolashaq» Qaýymdastyǵy keńesiniń tóraǵasy Baqtııar Máken memlekettik baǵdarlamalar barysyn túsindirip, jastardyń zaman talabyna saı bilim alýy, ǵylymmen aınalysýy jáne áleýmettik máseleler tóńireginde oı bólisti.
Zaǵıpa ıAhııaqyzy jastardyń ǵylymmen aınalysýyna, olarǵa áleýmettik kómek kórsetýge, jalpy agrarlyq ǵylymdy qoldaýǵa halyq qalaýlylary barynsha oń yqpal jasaıtynyn atap ótti.
Májilistegi Agrarlyq komıtettiń múshesi, bilikti maman Amangeldi Dáýrenbaev aýyldy kórkeıtýge baǵyttalǵan memlekettik baǵdarlamalardyń áli de jetildirýge tıis tustary bar ekenine toqtalyp, ýnıversıtet ujymy men stýdentterdiń talap-tilekterin eskere otyryp, tıisti organdarǵa arnaıy saýal jiberetinin aıtty.
Qazaq ulttyq agrarlyq ýnıversıtetiniń túlegi Baqtııar Máken óz sózinde joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý máselesi memlekettiń erekshe nazarynda turǵanyn atap óttti. Onyń sózinshe, jastardyń jańa bilim alýyna Qazaqstanda múmkindikter mol. Ol muny naqty mysaldarmen aıtyp ótti.
Qazirgi kezde oqý ornynyń jetistikterimen qatar, áli de tolyq sheshimin tappaı turǵan máseleler de az emes. Ýaqyt jyldam ózgerip, bilim, ǵylym, óndiriske qoıylatyn talaptar kúsheıýde. Agroónerkásiptik keshenge jańa ınnovatsııalyq tehnologııalar engizilýde. Sondyqtan, básekege qabiletti, jańasha oılaıtyn, tıimdi sheshimder qabyldaı alatyn, ınnovatsııaǵa beıim mamandar daıyndaýdyń jańa baǵyttaryn damytý kózdelip otyr. Otandyq kadrlardy daıarlaý, akademııalyq utqyrlyq aıasyn keńeıtý, jańa mamandyqtar ashý, suranysy joǵary mamandyqtarǵa memlekettik tapsyrysty kóbeıtý, stýdentterdiń áleýmettik jaǵdaıyn jaqsartý boıynsha áli de túıindi máseleler bar.
Búginde ýnıversıtte bilim alyp júrgen jastardyń 90% astamy - aýyl balalary. QazUAÝ stýdentteri basqa oqý oryndaryna qaraǵanda jataqhanaǵa óte muqtaj. Sondyqtan ýnıversıtet basshylyǵy bıyl 450 oryndyq «Stýdentter úıin» salýdy josparlap otyr. Qazirgi kezde onyń qurylysynyń jobalyq-smetalyq qujattary ázirlenip, tıisti organdarǵa usynys retinde jiberildi.
Jıyn barysynda atalǵan máselelerdi tıimdi sheshý joldary talqylanyp, ýnıversıtet ujymy men bilim alýshy jastardyń usynys-pikirleri tyńdaldy. Ýnıversıtet basshylyǵy depýtattarǵa senim bildirip, ujym men stýdent jastardyń usynystaryn jazbasha túrde, arnaıy hatpen joldaıtynyn jetkizdi.
Kezdesý sońynda qonaqtar ýnıversıtettiń oqý-ǵylymı ınfraqurylymyn aralap, oqý ornynyń ǵylymı ınnovatsııalyq ortalyqtarynda bolyp, jas ǵalymdarmen kezdesti.
Depýtattar, sonymen qatar ýnıversıtet janyndaǵy «Nursultan Nazarbaev bilim jáne ǵylym ortalyǵy» jumysymen tanysyp, bul ortalyqtyń tereń máni men mazmuny jastardy tárbıeleýge zor yqpal jasaıtynyn atap ótti.
