«KazToxBase» toksıkologııalyq aqparattyq ortalyǵy jumysyn bastady
ASTANA. KAZINFORM – QR Prezıdenti Іs basqarmasy Medıtsınalyq ortalyǵynyń Sanıtarııalyq-epıdemıologııalyq saraptama ortalyǵy bazasynda «KazToxBase» toksıkologııalyq aqparattyq ortalyǵy ashyldy. Sońǵy úlgidegi zamanaýı qondyrǵylarmen jabdyqtalǵan jańa ortalyq Eýropalyq Odaqpen birlesken joba aıasynda júzege asyp otyr.
Ortalyqtyń ashylý saltanatyna Eýropalyq komıssııanyń ókilderi jáne birqatar elden kelgen qurmetti meımandar qatysty. Lentany qııý baqyty QR Prezıdenti Іs basqarmasy Medıtsınalyq ortalyǵynyń orynbasary Lıýdmıla Bıýrabekova men Eýropalyq komıssııa syrtqy saıasat quraldary qyzmetiniń baǵdarlama menedjeri Marııa Rosa Sabatellıge buıyrdy.
Sanıtarııalyq-epıdemıologııalyq saraptama ortalyǵynyń dırektory Sáýle Sháripovanyń aıtýynsha, toksıkologııalyq aqparattyq ortalyǵynyń jumysy TOXBASE halyqaralyq bazasynyń derekteri negizinde júzege aspaq.
«Munda Dúnıejúzilik densaýlyq saqtaý uıymynyń usynymdaryna negizinde hımııalyq ýlanýdyń aldyn alý, dıagnostıkalaý jáne emdeý máseleleri boıynsha patsıentter men medıtsına qyzmetkerlerine konsýltatsııalyq kómek kórsetiledi. Jańa ortalyq Qazaqstanǵa hımııalyq ýlaný máseleleri boıynsha medıtsına qyzmetkerleriniń quzyrettilik deńgeıin arttyrýǵa jáne olardy úzdik álemdik tájirıbeler men halyqaralyq standarttar boıynsha oqytýǵa múmkindik beredi», - dedi Sáýle Sháripova.
Onyń aıtýynsha, jańa ortalyqtyń iske qosylýy aýrýhanalardaǵy júktemeni birshama azaıtyp, ekonomıkalyq turǵydan da tıimdi bolmaq. Buǵan deıin dıagnoz qoıý qıynǵa soqsa, endigi jerde TOXBASE halyqaralyq bazasynyń derekteri negizinde aýrýyna em izdegenderge barynsha kómek kórsetilmek.
Ázirge munda eki bilikti toksıkolog maman jumys isteıdi. Kadr demekshi, munda halyqaralyq trenıng ortalyǵy da óz jumysyn bastaǵanyn atap ótken jón. Bul ortalyqtyń ashylýy túrli kásipterdegi sanıtarııalyq dárigerlerdiń, toksıkologtardyń, ekologtardyń, zerthanalyq qyzmet mamandarynyń jáne bıznes ókilderiniń qoǵamdyq densaýlyq saqtaýdyń ózekti máseleleri boıynsha bilimin jetildirýge múmkindik berip, elimizdiń túkpir-túkpirinde bilikti kadrlardyń qatary artady degen senim mol.
Eýropalyq komıssııa syrtqy saıasat quraldary qyzmetiniń baǵdarlama menedjeri Marııa-Roza Sabatellı toksıkologııalyq aqparattyq ortalyqtyń ashylýy Qazaqstannyń densaýlyq saqtaý salasyn jańǵyrtýǵa degen oń kózqarasyn bildiretinin atap ótti.
«Mundaı ortalyq jýyrda Pákistanda ashyldy. Endi, mine, Qazaqstanda da óz jumysyn bastaǵaly tur. Ortalyqtyń ashylýy adamdardy ólimnen qutqarýǵa degen talpynys dep baǵalasaq bolady. Dúnıejúzilik densaýlyq saqtaý uıymynyń usynymdaryna da sáıkes keletinin atap ótken jón. Biz óz tarapymyzdan barynsha qoldaý kórsetip, birlese jumys isteýge daıynbyz», - dedi Eýropalyq komıssııa syrtqy saıasat quraldary qyzmetiniń baǵdarlama menedjeri Marııa Rosa Sabatellı.
