«Qazsýshardyń» tehnıka parki 31%-ǵa jańartyldy

ASTANA. KAZINFORM — Sý resýrstary jáne ırrıgatsııa mınıstrligi qurylǵaly beri «Qazsýshar» RMK-nyń tehnıka parkin parkin jańartý boıynsha belsendi jumys júrgizip keledi, dep habarlaıdy vedomstvo baspasóz qyzmeti.

Qazirgi tańda jańa qural-jabdyqtar men avtokólikter kásiporynnyń barlyq arnaıy tehnıkasynyń shamamen 31%-yn quraıdy. Búginde el boıynsha «Qazsýshar» RMK fılıaldary 524 jańa arnaıy tehnıka aldy. Olar qazirdiń ózinde gıdrotehnıkalyq qurylysjaılardy mehanıkalyq tazartý jáne jóndeý jumystaryna paıdalanyla bastady. Jalpy kásiporynǵa 757 avtokólik pen qural-jabdyq berý josparlanǵan. Mınıstrlik usynǵan tehnıkalar qatarynda ekskavatorlar, tıegishter, shynjyr tabandy ekskavatorlar, traktorlar, tirkemeler, samosvaldar, tartqysh kólikter, avtokrandar, janarmaı tasymaldaǵyshtar, qosalqy qural-jabdyqtar men dızeldi generatorlar bar. Arnaıy tehnıka parkin aýqymdy jańartýǵa deıin kásiporynda 1 665 avtokólik pen qural-jabdyq bolǵan.

— Jańa arnaıy tehnıka qurylys-montaj jáne jumystaryn jyldam ári tıimdi júrgizýge múmkindik beredi. Sondaı-aq sý tasqynyna qarsy kúresti de jaqsartady. Mınıstrlik bergen tehnıka qazirdiń ózinde tikeleı maqsatyna saı paıdalanylyp, gıdrotehnıkalyq nysandardyń senimdiligin jáne ırrıgatsııalyq kanaldardyń ótkizý múmkindigin arttyryp otyr, — dedi Sý resýrstary jáne ırrıgatsııa mınıstri Nurjan Nurjigitov.

Osydan buryn Sý resýrstary mınıstrligi qurylǵaly 1800-den astam sý mamany turaqty jumyspen qamtylǵanyn jazǵan edik.