Kazsat spýtnıkteri fermerler jumysyn jeńildetpek
«Búgingi tańda ǵarysh spýtnıkteri arqyly monıtorıng júrgizý mańyzdylyǵynyń artyp otyrǵanyna qýanyshtymyz. Qazirgi ýaqytta dıstantsııalyq zertteýdiń qazaqstandyq júıesi belsendi túrde qyzmet istep, sala úshin mańyzdy tapsyrmalardy oryndaý ústinde. Osylaısha, búgin biz osynda aıtylǵan máselelerdi sheshýge ún qosa alatynymyzdy bildirgim keledi», - dedi vıtse-mınıstr Parlament Májilisinde ótken «Jer resýrstaryn tıimdi paıdalanýdyń ózekti máseleleri» atty dóńgelek ústelde.
Ol óz sózin naqty mysaldarmen shegeleı tústi.
«Biz Bas prokýratýramen birge «Jer zań boıynsha: zańsyzdyqty toqtataıyq» atty aktsııa ótkizgen bolatynbyz. Osylaısha, aýmaǵy 4,7 mln gektarlyq 15 myń paıdalanylmaı jatqan ýchastogy anyqtaldy. Bul baǵyttaǵy jumys zańsyz ıelikte bolǵan 20,5 myń jer ýchaskesin 400-ge deıin qysqartýǵa múmkindik berdi. Sonymen birge, biz aýyl sharýashylyǵy, ındýstrııa jáne ınfraqurylymdyq damytý, ishki ister mınıstrligimen birge jumys júrgizemiz. Otandyq ǵarysh júıesiniń áleýetin barynsha qoldana bilýimiz kerek. Búgin Airbus týraly sóz boldy - oǵan da eki spýtnıgimiz kiredi. Ol spýtnıkter búkil álem boıynsha jumys jasaıdy», - deıdi spıker.
Marat Nurǵojın sonymen birge Aqparat jáne kommýnıkatsııalar mınıstrligimen keń jolaqty ınternet tartý jumysy da qyzý júrgizilip jatqanyn tilge tıek etti.
«Qazir 70 myńǵa tarta aýylda ınternet joq. Olardyń bárine ınternet tartý kerek. Fermerler úshin bul óte paıdaly bolady. Bizdiń Kazsat-2 jáne Kazsat-3 spýtnıkterimiz atalǵan máseleni sheshý úshin barynsha jumyldyrylatyn bolady», - deıdi Marat Nurǵojın.
Eske sala ketsek, atalmysh dóńgelek ústelde Úkimettik emes uıymdardyń, qoǵamdyq uıymdardyń ókilderi aýyl sharýashylyǵy jerlerin tıimdi paıdalaný máselesi boıynsha óz usynystaryn bildirgen bolatyn.
