«KazSat-3R» jobasyn qoldaýǵa 40 mlrd teńge qajet - senator
ASTANA. KAZINFORM – Senator Andreı Lýkın Qazaqstannyń ǵarysh salasyn damytýǵa qatysty naqty usynystaryn jetkizdi.
– Ǵarysh apparattaryn qurastyrý-synaq keshenine memlekettik satyp alýlar men tehnologııalyq úderis salasynda artyqshylyqtar men jeńildikter berý qajet. Jumys isteýge barynsha tıimdi jaǵdaı jasaýymyz kerek. Bul salada ýnıversıtetter men startaptardyń qatysýymen shaǵyn jerserikterdi (CubeSat, mıkrospýtnıkter) jasaý basty baǵyt bolýy múmkin. Sondaı-aq, Jerserikterdi basqarý ortalyǵyn keńeıtip, Qazaqstandy ǵarysh qyzmetterin – óndiris, ushyrý jáne tehnologııalyq súıemeldeý – eksporttaýshy el retinde ilgeriletý mańyzdy. Budan bólek, 40,2 mlrd teńge somasynda respýblıkalyq bıýdjetten birlesip qarjylandyrý arqyly «KazSat-3R» jobasyn qoldaý qajet, – dedi senator A.Lýkın Úkimet basshysynyń atyna joldaǵan saýalynda.
Ol sondaı-aq spýtnıktik baǵdarlamany jańǵyrtý, asa jeńil tasymaldaýshy zymyrandy ushyrý qajettigine nazar aýdardy. Buǵan qosa, kadr tapshylyǵyn joıý jáne ǵylymı negizdi júıeli túrde qalyptastyrý da ózekti ekenin atap ótti.
– Kadr daıarlaý men ǵylymı áleýetti damytýǵa erekshe kóńil bólý qajet. Injenerlik-ǵarysh fakýltetterin ashý, taǵylymdamalardy qoldaý, ǵylymı bazalardy damytý qajet. Ozyq tehnologııasyz turaqty ınnovatsııalyq ekonomıka qurý múmkin emes. Jerdi qashyqtyqtan zondtaý derekterin paıdalaný olardy aýyl sharýashylyǵynda, ekologııada, qurylysta jáne tótenshe jaǵdaılarda qoldaný jumys tıimdiligin arttyrady. Ásirese, sý resýrstary, jerdi paıdalaný jáne klımat monıtorıngi ózekti sanalady. Bolyp jatqan ózgeristerdi tirkep qana qoımaı, tótenshe jaǵdaılardyń aldyn alý, olardyń áserin azaıtý úshin naqty usynystar jasaý mańyzdy, – dedi senator.
Depýtat Ortalyq Azııa úshin spýtnıktik derekterdiń memlekettik platformasyn qurý usynysyn jarııalady.
Eske salsaq, buǵan deıin jalpy «KazSat-3R» spýtnıgin qurýǵa 87,2 mlrd teńge qajet ekeni málim boldy.
Atap aıtqanda, Qazaqstannyń jańa spýtnıkteri qashan ushyrylatyny týraly osyǵan deıin habarlaǵan edik.