«KazSat-3R» spýtnıgin qurýǵa 87,2 mlrd teńge qajet
ASTANA. KAZINFORM – «KazSat-3R» spýtnıgin qurýǵa boljammen 87,2 mlrd teńge qajet. Bul jaıynda Senat depýtattarynyń saýalyna Premer-Mınıstr Oljas Bektenovtiń jaýabynda aıtylǵan.
- «KazSat-3» spýtnıgin aýystyrý úshin ǵaryshtyq baılanys júıesin qurý jáne paıdalanýǵa berý» (budan ári – «KazSat-3R» jobasy) boıynsha jobalaý aldyndaǵy jumystar júrgizilip jatqanyn habarlaımyz. Túrli eýropalyq jáne azııalyq ǵarysh tehnıkasyn óndirýshi kompanııalardyń tehnıkalyq-kommertsııalyq usynystary qaraldy. Qarastyrylǵan usynystardy taldaý negizinde qazirgi ýaqytta ekonomıkalyq saraptamadan ótip jatqan ınvestıtsııalyq usynys jasaldy, - dedi Oljas Bektenov jaýabynda.
Úkimet basshysynyń málimetinshe, spýtnıkti qurýdyń boljamdy quny 87,2 mlrd teńge. Onyń ishinde respýblıkalyq bıýdjet esebinen - 40,3 mlrd teńge, «RǴBO» AQ menshikti qarajaty esebinen - 46,9 mlrd teńge.
- Bul soma spýtnıktik baılanys arnalary men tele-radıo habarlaryn taratý qajettiligin eskere otyryp, jobanyń ınvestıtsııalyq tartymdylyǵy men ekonomıkalyq tıimdiligi úshin jetkilikti. Ekonomıkalyq saraptamadan ótý qorytyndysy boıynsha bas merdiger óndirýshini tańdaý zańnamaǵa sáıkes jáne eń úzdik tehnıkalyq sheshimder men ekonomıkalyq oryndylyqty eskere otyryp, konkýrs negizinde júrgiziletin bolady, - dedi ol.
Aıta keteıik, 2014 jyldyń 28 sáýirinde Baıqońyr ǵarysh aılaǵynan «KazSat-3» qazaqstandyq baılanys jáne habar taratý spýtnıgi ushyrylǵan edi. 2016 jyldyń 1 naýryzynda «OTAU TV» ulttyq spýtnıktik televıdenıe abonentterin osy bortqa aýystyrylǵany jáne synaqtyń aıaqtalǵany jarııalandy. 2017 jyly elimizdiń barlyq telehabary «KazSat» ulttyq baılanys jáne habar taratý spýtnıkterine tolyqtaı kóshirildi.
Buǵan deıin Ulttyq ulan «Báıterek» keshenin memlekettik kúzetpen qamtamasyz etýi múmkin ekendigin jazǵan edik.