KazSat-3 arqyly ormannyń zańsyz kesilýin anyqtaýǵa bolady

ASTANA. QazAqparat - Qazaqstanda zańsyz aǵash keskeni úshin qylmystyq jaza qarastyrylǵan. Degenmen, atalǵan norma is júzinde óz nátıjesin berip otyrǵan joq. Sebebi kesilgen aǵashtan qalǵan tomarlardy eshkim sanamaıdy. Quqyq qorǵaý organdary da ondaı zań buzýshylyqtardy tirkeýge asyqpaıdy. Osy salanyń mamany Serik Turymbaev orman qoryn KazSat-3 arqyly baqylaýdy usynyp otyr, dep habarlaıdy QazAqparat tilshisi.

«Malaızııada orman qoryn baqylaý salasynda ǵaryshtyq tehnologııa keńinen qoldanylady. Olarda  26 kún saıyn spýtnık ótip otyrady. Sonda úsh aǵash ósip tursa, sonyń bireýin kesip alsa, 26 kúnnen keıin bárin kórip otyrady. Sebebi qazirgi ǵaryshtyq tehnıkanyń múmkindigi sol, jarty metr jerdegi nárseni túsirip, kórsete alady. Mine, osy ispetti tájirıbeni bizge de qoldanýǵa bolady. Qazir bizde «KazSat-3» apparaty ushyp júr. Onda sýretke túsiretin qurylǵylar bar. Sony paıdalaný qajet. Qazir ormandy aralap, árbir túp aǵashty sanaý sııaqty eski júıeden arylyp, jańa tehnologııalardyń múmkindikterin keńinen paıdalanýymyz qajet. Iá, birshama shyǵyndar bolady. Degenmen, elimizdiń orman qoryna keletin zııannyń kólemimen salystyrǵanda, ol shyǵyn kóp emes», - AShM janyndaǵy qoǵamdyq keńestiń múshesi Serik Turymbaev.

Onyń aıtýynsha, osydan birneshe jyl buryn aýylsharýashylyǵy mınıstrligi zańsyz aǵash kesý boıynsha 1,3 mlrd teńgeniń zańbuzýshylyqtaryn anyqtaǵan bolatyn. Sol kezde 800 mlrd teńgeniń shyǵyny dáleldendi. Alaıda istiń arty sıyrquıymshaqtanyp ketti. Sondyqtan búginde orman sharýashylyǵy salasyndaǵy zań buzýshylyqtardy anyqtaǵansha ondaı áreketterdiń aldyn alýyna basa nazar aýdarǵan jón.

Aıta keteıik, búginde Aýyl sharýashylyǵy mınıstrligi maıqaraǵaı aǵashtary ósetin aımaqtarda sanıtarlyq kesýge ýaqytsha tyıym salýdy usynyp otyr.  Sebebi elimizdiń ormandy jerlerine ıelik etip otyrǵandar jáne osy sanattaǵy jerlerdi jalǵa alǵandar sanıtarlyq aǵash kesýdi paıda tabýdyń kózine aınaldyrdy. Olar qýraǵan, shirigen jáne aýrý aǵashtardy kesip, sanıtarlyq sharalardy ótkizýdiń ornyna sap-saý aǵashtardy japyryp jatady. Sonyń saldarynan qazaqtyń myńdaǵan tekshe metrlik ormany qańyraǵan qý dalaǵa aınalyp barady.