Qazirgi mektepter qandaı úsh mindetti atqarýǵa tıis
ASTANA. KAZINFORM — Búgin Senat tóraǵasy Máýlen Áshimbaevtyń qatysýymen «Ulttyq múdde» dıalog alańynyń «Zamanaýı ulttyq mektep — jańa qoǵam qalyptastyrý joly» taqyrybyna arnalǵan otyrysy ótti. Іs-shara barysynda bilim berý, mádenıet, óner salasynyń mamandary, sarapshylar, ǵalymdar jáne senatorlar ulttyq bilim berý júıesiniń damý úrdisin talqylap, osy baǵytty reformalaý jóninde usynystaryn bildirdi.
Senat tóraǵasy óz sózinde qazirgi qoǵamdy qalyptastyrýdyń jáne ulttyq qundylyqtardy dáripteýdiń negizgi faktory bilim berýdi, ǵylymdy jáne mádenıetti keshendi túrde damytý ekenin atap ótti.
Osyǵan baılanysty sapaly jáne qoljetimdi bilim berý memleket saıasatynyń basym baǵyttarynyń biri ekeni de aıtyldy. Bul rette jańa tásilderdi qalyptastyrýǵa jáne menedjmentti jaqsartýǵa erekshe kóńil bólinip otyr.
Sondaı-aq Máýlen Áshimbaev Memleket basshysynyń tapsyrmasy boıynsha elimizde pedagog mártebesin arttyrýǵa jáne osy saladaǵy jas mamandardy yntalandyrýǵa arnalǵan reformalar iske asyrylǵanyn tilge tıek etti.
«Bilim salasy Prezıdentimiz Qasym-Jomart Kemeluly Toqaevtyń árdaıym basty nazarynda. Sonyń nátıjesinde elimizde ustazdardyń jalaqysy aıtarlyqtaı ósti jáne pedagog mártebesi zańmen aıqyndaldy. Memleket basshysy Joldaýda atap ótkendeı, biz mádenıetti, bilimdi, ǵylymdy damytý arqyly qazirgi ashyq álemniń bir bólshegi bolýǵa umtylýymyz kerek. Osy qundylyqtarǵa negiz bolatyn jáne olardy boıǵa sińiretin basty orta — mektep ekeni daýsyz. Shyn máninde, mektep — adamı kapıtaldy damytatyn jáne zamanaýı qoǵam qalyptastyratyn negizgi oryn», — dedi Máýlen Áshimbaev.
Palata spıkeri ulttyq bilim berý júıesin reformalaý barysynda oqýshylardy tulǵa retinde, olardyń biregeı qabiletterin damytýǵa basymdyq berý qajet ekenine nazar aýdardy.
Qazirgi jalpylama oqytý tásili buǵan tolyq múmkindik bermeıdi.
«Mektep — adamı kapıtaldyń sapasyn qalyptastyratyn jáne eldiń búgingi bolmysy men bolashaq áleýetin aıqyndaıtyn birden-bir orta. Osy oraıda mekteptiń negizgi úsh fýnktsııany júzege asyrýy mańyzdy. Birinshisi — bilim berý. Bul rette oqýshylardyń tulǵalyq ereksheligin eskerýge, jańa, biregeı bilim berý baǵdarlamalaryn qurýǵa, júıeli túrde muǵalimderdiń biliktiligin arttyrýǵa jáne ınternet pen tsıfrly resýrstardyń múmkindigin tıimdi paıdalanýǵa basa mán berý qajet. Ekinshiden, oqýshylardyń boıynda ártúrli daǵdylardy — soft skills damytý da úlken mindet. Qazir oqýshylarǵa synı jáne shyǵarmashylyq oılaý daǵdysyn úıretý, olardyń boıyna kommýnıkatsııalyq qabiletterdi, komandamen jumys isteýdi, kez kelgen ortaǵa tez beıimdelýdi sińirý mańyzdy. Úshinshiden, mekteptiń tárbıe oshaǵy ekenin umytpaýymyz kerek. Adamı jáne ulttyq qundylyqtardy dáripteýde, úlkenge qurmet, kishige izet, eńbekqorlyq, meıirim, jaýapkershilik sııaqty qasıetterdi jas býynnyń sanasyna sińirýde mektepterdiń rólin arttyrǵan abzal», — dedi Máýlen Áshimbaev.
Sonymen qatar otyrysta pedagogterdiń quzyretterin arttyrý, bilim berý baǵdarlamalary men oqytý ádistemelerin keńeıtý, ǵylym salasyndaǵy memlekettik saıasatty iske asyrý jáne jas ǵalymdarǵa zertteýler júrgizý baǵytynda qoldaý kórsetý jóninde usynystar aıtyldy.
«Ulttyq múdde» dıalog alańynyń otyrysyna senatorlarmen qatar Oqý-aǵartý vıtse-mınıstri Edil Ospan, QR UǴA akademıgi Dıhan Qamzabekuly, Maqsut Narikbayev University basqarma tóraǵasynyń orynbasary Aınur Káribozova, «Nazarbaev zııatkerlik mektepteri» basqarma tóraǵasynyń orynbasary Aıdana Shilibekova, Halyqaralyq «Qazaq tili» qoǵamynyń prezıdenti, «Bilim Media Group» dırektory Raýan Kenjehanuly, «IQanat» qorynyń akademııalyq dırektory Zýhra Shegenova, PISA zertteýleri boıynsha ulttyq jobalyq menedjer, «Taldaý mektebi» jobasynyń qatysýshysy Rızagúl Syzdyqbaeva jáne taǵy basqa sarapshylar qatysyp, sóz sóıledi.
