Qazir túrki jurtynyń kóshi ilgeri - Erlan Qoshanov
ASTANA. KAZINFORM – Astanadaǵy Túrki memleketterdiń Parlamenttik Assambleıasynyń plenarlyq otyrysynda Parlament Májilisiniń tóraǵasy Erlan Qoshanov tarıhtyń talaı tosqaýyly túrki birligin ydyrata almaǵanyn aıtty.
- Ózderińiz bilesizder túbi bir túrki dúnıesiniń tamyry tereńde jatyr. Elderimizdiń tarıhy men rýhanı bastaýy, mádenıeti men tili, taǵdyry ortaq. Jańa ǵana Qazaqstan Prezıdenti Qasym-Jomart Toqaev bizben arnaıy kezdesip, osy týystyq-dostyq qarym-qatynasty erekshe atap ótti. Nebir qıly zamandardy bastan keshsek te, aramyz ajyraǵan joq. Keıingi kezeńde baýyrlas elderimizdiń yntymaǵy burynǵydan da bekemdene túsýde. Bul bizdiń halyqtarymyzdyń arman-ańsaryna, maqsat-muratyna tolyq saı keledi, - dedi Májilis spıkeri.
Sondaı-aq, ol baıyrǵy babalardan bastalǵan tarıhı sabaqtastyq búginde «túrki elderiniń ıntegratsııasy» degen uranmen jalǵasyn taýyp jatqanyn atap ótti.
- Qazir túrki jurtynyń kóshi ilgeri. Ózara tatýlyq pen túsinistiktiń arqasynda elderimiz órkendep keledi. Bul – eń áýeli bizdiń memleketterimizdiń basshylary júrgizip otyrǵan baıypty saıasattyń nátıjesi. Prezıdentterimiz túrki ıntegratsııasy baǵytynda orasan jumys atqaryp jatyr.
Álemdegi geosaıası ahýal myń qubylyp turǵanyna qaramastan, túrki elderi ósý men órleýdiń qubylasynan, damýdyń dańǵyl jolynan jańylǵan joq. Osy qalpymyzdan taımasaq, áli talaı jetistikke jeterimiz anyq, - dedi Erlan Qoshanov.
Buǵan deıin Qazaqstan, Ázerbaıjan, Qyrǵyzstan jáne Ózbekstan jáne Soltústik Kıpr Túrik Respýblıkasy parlamentteriniń spıkerleri Ulttyq ǵarysh ortalyǵyna baryp, ǵarysh apparattaryn qurastyrý-synaý kesheniniń jumysymen tanysqanyn jazǵan edik.