Qazir elimizdegi volonterlerdiń sany 300 myńǵa jetti

ASTANA. KAZINFORM – Qazaqstan «volonter bolam, qoǵamdyq ispen aınalysam» degen árbir azamatty qoldaıdy. Bul týraly Memleket basshysy Volonterler forýmynda aıtty.

- Qazir elimizde 1 ulttyq jáne 20 aımaqtyq front-ofıs tabysty jumys istep tur. Eriktilerdiń sany da artyp keledi. 2020 jyly Qazaqstanda 50 myń volonter bar edi. Qazir olardyń qatary 300 myń adamǵa jetti. Elge paıdaly jumyspen aınalysatyn uıymdardyń sany tórt esege jýyq ósip, 800-den asty.

Qazirgi tańda eriktilerimiz ekologııa, bilim, mádenıet jáne basqa da salalar boıynsha mańyzdy bastamalar kóterýde. Sonyń ishinde «Jas aǵash», «Eko baqylaý», «Bilim volonterleri» jobalaryn erekshe atap ótýge bolady. Osyndaı is-sharalarǵa 100 myńǵa jýyq erikti qatysty. Ár bastamanyń elge, qoǵamǵa berer paıdasy mol.
Men ózderińiz sııaqty jasampaz jastarǵa zor úmit artamyn.

Biz bárimiz bir el bolyp, aýqymdy sharýa atqardyq. Endi toqtamaı, tek qana alǵa qaraı júrý úshin zaman aǵymyna saı bolý óte mańyzdy. Sondyqtan eriktiler qozǵalysyn damytýǵa qatysty birneshe ózekti mindetke toqtalaıyn, - dedi Qasym-Jomart Toqaev.

Memleket basshysy volonterdiń tsıfrlyq pasportyn jasaý týraly usynysqa qoldaý bildirdi

- Volonterlik qyzmette jańa tehnologııalardy keńinen paıdalaný kerek.

Men Joldaýymda Qazaqstan úsh jyl ishinde tolyq tsıfrlyq el bolýǵa tıis degen mindet qoıdym. Soǵan sáıkes naqty jumys istelip jatyr.

El ómiriniń barlyq salasyna ozyq tehnologııa tásilderi, ásirese, jasandy ıntellekt júıesi engizile bastady. Eriktiler qozǵalysy da bul jumystan shet qalmaýy kerek.

Men volonterdiń tsıfrlyq pasportyn jasaý týraly usynysty tolyq qoldaımyn, - dedi sodan soń Prezıdent.

Aıta keteıik, Prezıdent volonterlerge qazaqtyń meıirban ult ekenin is júzinde kórsetip júrgenderin aıtty.