Qazposhtadan 294 mln teńge urlaǵandar 7 jylǵa sottaldy

NUR-SULTAN. QazAqparat – Alaıaqtyq jolmen «Qazposhta» AQ-dan 294 mln teńgeden asatyn qarjyny qoldy etkender sottaldy, dep habarlaıdy QazAqparat tilshisi Nur-Sultan qalalyq sotyna silteme jasap.

«27 shildede Nur-Sultan qalasy sotynyń qylmystyq ister jónindegi sot alqasy urlyq pen alaıaqtyq úshin sottalǵandardyń jazalaý úkimin ózgerissiz qaldyrdy. Tek olardyń avtokóligine qoıylǵan arest kúshin joıdy. Sebebi, aıyptylardyń avtomobılderdi qylmystyq jolmen tabylǵan qarajatqa satyp alynǵany týraly dálel joq. Nur-Sultan qalasy Almaty aýdanynyń №2 sotynyń sheshimimen B, J, D jáne L 6 jyldan 7 jylǵa deıin bas bostandyǵynan aıyryldy. Olar «Qazposhta» AQ-dan 294 mln teńgeden asatyn asa iri kólemde qarjy urlaǵany úshin kináli dep tanyldy», - delingen sottyń habarlamasynda.

Sotta anyqtaldy:

Sottalǵandar belgisiz adamdarmen birge aldyn ala sóz baılasyp, pandemııany paıdalanyp, azamattarǵa ekinshi deńgeıdegi bankterden shot ashýdy jáne aqshalaı syıaqy úshin 10 000-nan 100 000 teńgege deıin bank kartalaryn satyp alýdy usynǵan jáne derekterdi belgisiz «hakerlerge» jibergen.

Hakerler «Qazposhta» AQ ınternet-resýrsynda qyzmetterdi paıdalanýshy retinde reseılik IP mekenjaılardan tólem júıesine kirý úshin 14 akkaýntty tirkegen. Osylaısha, tólem operatsııalaryn júrgizedi jáne «Qazposhta» AQ shotynan aqsha qarajatyn esepten shyǵaryp, olardy aldyn ala daıyndalǵan kartochkalyq shottarǵa jáne uıaly operatorlardyń abonenttik nómirlerine aýdarǵan.

B, J jáne D birneshe ret alaıaqtyq jasaǵany úshin kináli dep tanyldy. Belgisiz tulǵalar «Qazposhta» AQ fılıaldarynyń shalǵaı bólimshelerine qońyraý shalyp, ózderin bas keńseniń IT bóliminiń qyzmetkerimiz dep tanystyrǵan. Sodan soń tólem júıesin baptaý nemese jańartý syltaýymen bólimshe operatorlaryn jańylystyrdy, olar bógde bireýlerdiń bergen nusqaýlaryn oryndaı otyryp, is júzinde aqsha qarajatyn esepten shyǵarý boıynsha zańsyz operatsııalar júrgizdi.

Sodan keıin olar urlanǵan qarjyny qolma-qol etý úshin basqa shottarǵa aýystyrdy. Urylar qarjynyń bir bóligin kartochkalyq shot arqyly sheship alǵan. Al qalǵan bóligi krıptovalıýta satyp alýǵa baǵyttalǵan.

«Qazposhta» AQ keltirilgen zalaldy óteý maqsatynda sotqa júginý týraly sheshim qabyldady.

Úkim zańdy kúshine endi.